Það var hátíðleg stund í Selfosskirkju í gærkvöldi þegar Karlakór Selfoss hélt seinni jólatónleika sína á þessari aðventu. Fullt var út úr dyrum á tónleikana.
Aðgangur var ókeypis en tekið við frjálsum framlögum sem runnu í Sjóðinn góða. Kórinn hélt tónleika í Skálholti í síðustu viku undir sömu formerkjum og á tónleikunum tveimur söfnuðust samtals 651.160 krónur sem kórinn afhenti sjóðnum. Kórinn gefur sína vinnu, stjórnanda og undirleikara en eini kostnaðurinn sem er dreginn af frjálsum framlögum er húsaleiga í Selfosskirkju.
Tónleikagestir í Selfosskirkju gerðu góðan róm að söng kórsins, enda var efnisskráin fjölbreytt, bæði létt og hátíðleg. Sérstakur gestur á tónleikunum var Berglind Magnúsdóttir, sem söng nýja jólalagið Jólagjöfin í ár! ásamt kórnum. Í lokin var einstök stund þar sem kórinn og tónleikagestir sungu saman Heims um ból.
Sjóðurinn góði er samstarfverkefni ýmissa mannúðar- og líknarfélaga, kirkjusókna og félagsþjónustu í Árnessýslu. Hlutverk sjóðsins er að styrkja einstaklinga og fjölskyldur sem standa höllum fæti og eiga ekki fyrir nauðþurftum fyrir jólin og einnig á vormánuðum fyrir fermingar. Hægt er að kynna sér sjóðinn á heimasíðu hans.