JóiPé og Króli fara ásamt hljómsveit í ferðalag hringinn í kringum landið og spila á fjórtán tónleikum í jafnmörgum bæjarfélögum.
Fyrsti viðkomustaðurinn er Hljómahöllin í Keflavík næstkomandi fimmtudagskvöld en föstudaginn 25. júní verða þeir í Midgard Base Camp á Hvolsvelli og laugardaginn 26. júní í Skyrgerðinni Hveragerði, áður en haldið verður austur á land og spilað á Hafinu á Höfn 27. júní. Hringferðin heldur svo áfram og undir lok hennar koma þeir félagar fram á Kótelettunni á Selfossi föstudaginn 9. júlí.
JóiPé og Króli hafa þrátt fyrir ungan aldur gefið út fimm plötur á sex árum sem eru hver annarri ólíkari og kom sú nýjasta, Í miðjum kjarnorkuvetri, út á síðasta ári. Lög þeirra hafa slegið hvert metið á eftir öðru í hlustunum, þeir hlotið bæði Hlustenda- og Íslensku tónlistarverðlaunin fyrir verk sín og svo mætti lengi telja. Drengirnir eru spenntir að mæta og spila öll sín bestu lög þar sem stuð og stemning verður í fyrirrúmi.
Hljómsveitina skipa ásamt JóaPé og Króla:
Hljómsveitarstjórn/gítar: Hafsteinn Þráinsson.
Bassi: Starri Snær Valdimarsson.
Trommur: Ísak Emanúel Glad Róbertsson.
Hljómborð/trompet: Kári Hrafn Guðmundsson.
Plötusnúður/þeytisnælda/munnharpa: Axel Magnús Kristjánsson.