Íslenski bærinn opnar formlega í dag

Formleg opnun sýningarinnar „Íslenski bærinn, fegurð og útsjónarsemi“ verður í dag, laugardag, í húsakynnum Íslenska bæjarins að Austur Meðalholtum í Flóa.

Sýningin markar upphaf formlegrar starfsemi stofnunar sem verið hefur í uppbyggingu mörg undanfarin ár.

Menningarsetrið Íslenski bærinn er húsaþorp, sýningarstaður, samkomustaður og leikvöllur sem hverfist um íslenska torfbæinn og græna byggingalist. Þar er ætlunin að gestir upplifi einstakan staðaranda, jafnframt því að skoða sýningar sem útskýra samhengi, þróun og tilbrigði íslenskra torfbæja með það að leiðarljósi að túlka aldagamlan og einstakan arf inn í samtímann með samþættingu, fræðimennsku, listrænni nálgun og varðveislu verkmenningar.

Á opnunardeginum verður opið hús á milli kl. 14 og 17.