Árlegir jólatónleikar Karitasar Hörpu verða að þessu sinni haldnir í Selfosskirkju miðvikudagskvöldið 19. desember.
„Ég hef gert það síðastliðin ár að halda jólatónleika eða jólastund, sem kostar lítið eða ekkert á, svo sem flestir eigi möguleika á að mæta. Ég kýs að kalla þetta jólastund því mér finnst þetta aðeins meira en bara tónleikar. Ég vel þennan tíma, svona nálægt jólunum í von um að fólk geti litið á þetta sem einskonar hvíld frá amstri dagsins og stressinu sem svo auðveldlega getur skapast á þessum tíma,“ segir Karitas.
Tónleikarnir eru með örlítið stærra sniði en síðustu ár og ólíkt síðustu árum verða einungis einir tónleikar.
Karitas gerir allt sem í hennar valdi stendur til að fanga heimilislegan, einlægan og fallegan jólaanda þetta kvöld ásamt hljóðfæraleikurunum Stefáni Þorleifssyni og Alexander Frey Olgeirssyni. En ásamt Karitas Hörpu ljá þau Daníel E. Arnarsson og Sólveig Ásgeirsdóttir raddir sínar til að skapa þessa töfrandi stund.
Í lok tónleika verður boðið upp á heitan drykk og smákökur fyrir tónleikagesti.
Miðasala er í fullum gangi á tix.is