Leikfélag Eyrarbakka frumsýnir þann 30. október næstkomandi leikritið Kvennaráð eftir Sellu Páls. Leikritið er beitt, fyndið og spennuþrungið verk sem tekst á við efnishyggju, völd og kynslóðamun.
Sýningin er í höndum hinnar reyndu leikstýru Huldu Ólafsdóttur, en hlutverkin þrjú eru í höndum öflugra áhugaleikkvenna þeirra Auðar Elínar Hjálmarsdóttur, Elku Long Rúnarsdóttur og Feng Hannesdóttur.
Uppgjör mæðgna og óvæntur bandamaður
Leikritið Kvennaráð fjallar um Þorgerði, ekkju sem stóð alla tíð í skugga eiginmanns síns. Þegar hann fellur frá ákveður hún að hrista upp í tilverunni, taka stjórnina í eigin hendur. Þessi nýfengna frelsisþrá mætir harðri mótspyrnu hjá dóttur hennar, Birnu, sem er framagjörn, stjórnsöm og stöðugt á hlaupum. Þorgerður stendur þó ekki ein í baráttunni, en hún finnur óvæntan andlegan sálufélaga og dýrmætan bandamann í kínversk-íslensku húshjálpinni Mei.
„Sprauta beint í æð“
Verkið var frumkynnt með leiklestri á vegum hópsins Leikhúslistakvenna 50+ í Hannesarholti árið 2018 undir leikstjórn Sveins Einarssonar. Leiklesturinn hlaut mikið lof gagnrýnenda. Jakob S. Jónsson, leiklistarfræðingur, skrifaði í Kvennablaðið að sagan væri „heilsteypt, margræð, skrifuð af fjöri, innsæi og innlifun.“ Bryndís Schram skrifaði um verkið í DV að upplifunin af verkinu hefði verið eins og að „fá sprautu beint í æð“ vegna þess hve vel það dró upp mynd af harðskeyttum samtíma okkar með beittum og eðlilegum samtölum sem væru gædd „kaldhæðnu skopi“.
Það er því fagnaðarefni að Leikfélag Eyrarbakka blási nú lífi í þetta verk Sellu Páls.
Hulda hefur leikstýrt fjölmörgum leikritum víða um land, auk þess að semja leikrit, söngleiki og revíur. Leikkonurnar Auður og Elka eru mæðgur. Elka, er sex barna móðir og stígur hún á svið í fyrsta sinn. Feng sem búið hefur á Íslandi í áratugi, stígur einnig á svið í fyrsta sinn á Íslandi, en hún hefur leikið í kvikmyndum.
Frumsýning verður föstudaginn 30. október kl. 20. Alls verða sex sýningar. Sýnt er í Rauða húsinu og miðar seldir á tix.is.
