Hreimur Örn Heimisson, söngvari Lands og sona, var í viðtali við Popparasögur, nýtt hlaðvarp þar sem Selfyssingurinn Vignir Egill Vigfússon fjallar um íslenska tónlist. Þar tilkynnti Hreimur að Land og synir, sem hafa ekki verið starfandi undanfarin ár, muni koma saman á ný í sumar.
„Ég ætla að draga Land og syni úr slipp núna árið 2026. Við ætlum að spila hjá honum Magna á Bræðslunni og við erum að hugsa um að koma fram á 10 ára afmæli Hjarta Hafnarfjarðar,” segir Hreimur Örn og bætir við: „Ég veit ekki hvort að við gerum mikið meir en það. Ef Rás 2 hringir og biður mig um að koma á Tónaflóðið með Land og syni þá skal ég svara játandi.”
Hreimur Örn fór um víðan völl í spjalli sínu og ræddi meðal annars um það þegar Land og synir fengu fimm plötu samning hjá útgáfufyrirtæki í Bandaríkjunum og hvernig honum gafst tækifæri til þess að svíkja félaga sína í hljómsveitinni og skrifa undir samninginn einn. „Ég var boðaður á fundinn kl. 14 en þeir voru boðaðir kl. 15. Ég held að ég hafi aldrei sagt þetta í neinu viðtali. Ég veit ekki hvort þeir viti þetta.”
Hann ræddi einnig um Þjóðhátíðarlögin en hann hefur komið að sex slíkum. Á fjögurra ára tímabili, árin 1999 til 2002, söng hann þrjú Þjóðhátíðarlög. Eitt af þeim var eitt vinsælasta Þjóðhátíðarlag seinni tíma, Lífið er yndislegt, en ekki voru allir sáttir við lagið þegar það kom út.
„Þjóðhátíðarnefndin þá, ekki allir en flestir, voru á því máli að þetta væri skelfilegt Þjóðhátíðarlag, þetta ætti aldrei að fá að vera Þjóðhátíðarlag, það er ekkert talað um Vestmannaeyjar í þessu lagi og við skulum fá, held ég að þeir hafi sagt, Einar Bárðar til að semja eitthvað neyðarlag,” rifjar Hreimur upp í viðtalinu.
Hreimur talar einnig opinskátt um vinamissi en tveir nánir vinir hans úr tónlistinni, Sigurjón Brink og Njáll Þórðarson, féllu frá langt fyrir aldur fram. Sigurjón og Hreimur voru miklir vinir og spiluðu oft saman. Hreimur var hluti af Vinum Sjonna sem tóku þátt í Eurovision árið 2011 með lag Sjonna, Coming home. Njáll var hljómborðsleikari í Landi og sonum og hafði mikil áhrif á Hreim.
„Þetta er búið að vera erfitt, mjög erfitt. Tveir góðir vinir í tónlistinni sem hverfa,” segir Hreimur sem hefur samið tvö lög um tilfinningar sínar eftir fráfall þeirra, lögin Skilaboðin mín og Hinum megin við.
Viðtalið í heild sinni má finna á Popparasögum á helstu streymisveitum.