Ný ’80s ábreiða er komin á YouTube-rás Hr. Eydís af laginu Eye of the Tiger, einu þekktasta rokklagi níunda áratugarins.
Lagið kom upphaflega út árið 1982 með hljómsveitinni Survivor og var samið af hljómsveitarmeðlimunum Frankie Sullivan og Jim Peterik sérstaklega fyrir kvikmyndina Rocky III.
Skemmtileg saga tengist tilurð lagsins. Sylvester Stallone hafði upphaflega hug á að nota Another One Bites the Dust með Queen í myndinni en fékk ekki leyfi. Hann leitaði þá til Survivor og bað hljómsveitina um að semja nýtt lag. Úr varð Eye of the Tiger, sem varð einn stærsti smellur ársins 1982 og hefur síðan verið nánast órjúfanlega tengt Rocky, líkamsrækt og peppi.
Að þessu sinni er það Erna Hrönn sem syngur aðalröddina með Hr. Eydís.
„Lagið er eiginlega lengst upp í rassgati og aðeins of hátt fyrir mig,“ segir Örlygur Smári, söngvari og gítarleikari Hr. Eydísar. „Erna tók því við hljóðnemanum og það var heldur betur kraftur í okkar konu. Maður þarf varla nema fyrstu sekúndurnar af þessu riffi til að komast í gírinn og fá næstum löngun til að skella sér í ræktina.“
Með í upptökunni er einnig gítarleikarinn Sveinn Pálsson, sem hefur oft komið fram með Hr. Eydís og verður með sveitinni á hausttúrnum ALVÖRU ’80s PARTÝ – Movie Hits.
Þar verða stærstu kvikmyndasmellir níunda áratugarins í aðalhlutverki og nostalgían í botni! Tónleikarnir verða á Akureyri 10. október, Selfossi 17. október og í Háskólabíói í Reykjavík 7. nóvember. Miðasala er nú í fullum gangi.