Hljómsveitin Hr. Eydís hefur gefið út nýja ábreiðu af hinu klassíska ’80s lagi 99 Luftballons með hinni þýsku Nena. Upptakan er frá uppseldum tónleikum sveitarinnar í Bæjarbíói um síðustu helgi og er nú komin út á YouTube-rás hennar.
Þetta er jafnframt fyrsta þýska lagið sem sveitin tekur fyrir í sinni ’80s dagskrá.
„99 Luftballons“ kom upphaflega út árið 1983, á tímum þegar Berlínarmúrinn stóð enn og kaldastríðið var í fullum gangi. Lagið varð á sínum tíma risastórt og endurspeglar ótta og spennu þess tíma. Athyglisvert er að þýska útgáfan naut mikilla vinsælda í Bandaríkjunum, jafnvel meiri vinsælda en sú enska sem heitir „99 Red Balloons“.
Hugmyndin að laginu kviknaði þegar gítarleikari Nena sá blöðrum sleppt á tónleikum í Berlín og velti fyrir sér hvað myndi gerast ef þær flygju yfir Berlínarmúrinn og yrðu misskildar sem ógn. Úr varð saga um það hvernig saklaus atburður getur leitt til keðjuverkunar með alvarlegum afleiðingum.
Hr. Eydís er þekkt fyrir kraftmikla ’80s tónleika þar sem stemningin ræður ríkjum. Sveitin flutti lagið nýlega fyrir uppseldum sal í Bæjarbíói við frábærar undirtektir.
„Vá, það varð allt vitlaust í Bæjarbíói þegar við tókum 99 Luftballons og við hlökkum mikið til að spila þetta aftur á vortúrnum,“ segir Örlygur Smári einn meðlima Hr. Eydís. Framundan er vortúr sveitarinnar þar sem hún heimsækir Selfoss, Mosfellsbæ og Akureyri, undir yfirskriftinni „ALVÖRU ’80s PARTÝ“.