Laugardaginn 8. ágúst verður smellt í heljarinnar handverks og hönnunarhátíð á Borg í Grímsnesi. Hátíðin er sett á laggirnar með það að markmiði að gera Borg að áfangastað heimilisiðnaðar í héraðinu hvort sem er listmunir, handverk eða matvæli.
Fullbókað er á handverkshátíðina sem verður til húsa í Félagsheimilinu á Borg og verður opin frá kl 11-16. Um 20 handverksmenn og konur hafa boðað þátttöku en einnig verður spákona á staðnum sem spáir í spil og bolla fyrir þá sem áhuga hafa á því. Fólk er hvatt til að koma með bolla með sér. Hægt verður að kaupa kaffi í götubitabílnum, The Rolling Bites Food Truck sem verður á hlaðinu fyrir utan og selur gómsætan götubita. Andlitsmálun stendur til boða fyrir börnin.
Áhugasamir geta kíkt á Facebook síðu hátíðarinnar og allir sem brenna fyrir hönnun, handverki og íslenskri framleiðslu eru hvattir að kíkja á Borg í Grímsnesi á laugardaginn milli 11 og 16.