Hjartastaður endurútgefin – Útgáfuhóf í Bókakaffinu

Fimmtudaginn 30. júlí verður skáldsagan Hjartastaður eftir Steinunni Sigurðardóttur endurútgefin. Í tilefni þess verður haldið útgáfuhóf í Bókakaffinu á Selfossi klukkan 19:30.

Hjartastaður er ein þekktasta skáldsaga Steinunnar og hefur verið ófáanleg lengi. Fyrir hana hlaut hún Íslensku bókmenntaverðlaunin 1995 og jafnframt var bókin tilnefnd til Evrópsku Aristeion Bókmenntaverðlaunanna og til Bókmenntaverðlauna Norðurlandaráðs.

Hjartastað má lýsa sem nokkurs konar vegamynd. Hún er nú endurútgefin við þær sérstöku aðstæður, að Íslendingar hafa í bili endurheimt landið sitt úr „greipum“ erlendra ferðamanna. Bókin kom út áður en ferðamannabylgjan reið yfir, og eru vega- og náttúrulýsingar í samræmi við friðsældina sem var glötuð og ríkir nú aftur.

Dagskráin er einkar skemmtileg en ásamt því sem Steinunn sjálf mun lesa upp úr bókinni mun Harpa Rún Kristjánsdóttir, rithöfundur, kynna hana og Kristján B. Jónasson, bókaútgefandi, flytja erindi um bókina.