Sveitarfélögin Rangárþing ytra og Rangárþing eystra standa fyrir glæsilegri Fjölmenningarhátíð næstkomandi laugardag, þann 9. maí í íþróttahúsinu á Hellu kl. 14-16. Hátíðin er opin öllum og verður sannkölluð veisla fyrir skynfærin þar sem íbúar og gestir fá tækifæri til að kynnast fjölbreyttri menningu frá ólíkum heimshornum.
Fyrsta sameiginlega fjölmenningarhátíð sveitarfélaganna tveggja var haldin í fyrra á Hvolsvelli og heppnaðist gríðarlega vel.
„Já, hátíðin tókst með endemum vel í fyrra, fleiri hundruð manns sóttu hátíðina sem var studd dyggilega af SS og Holta kjúklingi, sem voru með framlög í formi matvæla. Það voru glæsileg atriði, söngur, tónlist og dans sem að sýndu flóru fjölmenningarnar á svæðinu og maturinn var hreint stórkostlegur. Að fá smakk af hinum ýmsu réttum frá löndum heimsins var það sem fyllti salinn af sælu og hamingju,“ segir Jóhann G. Jóhannsson, íþrótta- og fjölmenningarfulltrúi Rangárþings ytra í samtali við sunnlenska.is. Hann bætir við að hátíð sem þessi sé sameiningarafl.
„Markmiðið er að skapa vettvang þar sem fólk kemur saman, deilir sinni menningu og kynnist hvert öðru á jákvæðan og opinn hátt sem sameinar og styður inngildingu á svæðinu,“ bætir Jóhann við.
Í Rangárþingi búa einstaklingar frá um 40 mismunandi löndum og á hátíðinni munu þátttakendur kynna sínar rætur og hefðir með fjölbreyttum hætti – meðal annars í gegnum mat, tónlist, dans, list, þjóðbúninga og frásagnir. Gestir geta gengið á milli borða, smakkað spennandi rétti, hlustað á tónlist og upplifað lifandi menningu í notalegu og fjölskylduvænu umhverfi.
Sérstök áhersla verður lögð á börn og fjölskyldur, með skapandi og skemmtilegum verkefnum sem höfða til yngstu gesta. Þá mun alþjóðlegur kór koma fram, einnig Tónlistarskóli Rangæinga ásamt dansatriði.
Enn er opið fyrir þátttöku á hátíðinni er styrkur frá sveitarfélögunum er í boði fyrir þá sem vilja kynna sína menningu.
