Leikfélag Hveragerðis frumsýndi í gærkvöldi leikritið um Pílu Pínu eftir Kristján frá Djúpalæk og Heiðdísi Norðdal með tónlist Heiðdísar og Ragnhildar Gísladóttur.
Leikstjóri er Gunnar Gunnsteinsson en þetta er þriðja ævintýrið sem hann leikstýrir í Hveragerði. Áður leikstýrði hann Benedikt búálfi veturinn 2022-2023 og Ávaxtakörfunni veturinn 2024-2025 við fádæma vinsældir. Helgi Fr. Georgsson Kemp hefur gert nýjar útsetningar á tónlistinni og Sindri Mjölnir Magnússon glæddi margar senur lífi með teiknaðri grafík.
Píla Pína skipar stóran sess í hjörtum margra Íslendinga, en saga hennar og ævintýri hafa glatt kynslóðir barna frá því að það var flutt af Heiðdísi í útvarpi haustið 1979 og kom út á plötu ári síðar. Boðskapur sögunnar er fallegur og stendur vel fyrir sínu. Í þessari ljúfsáru sögu er komið inn á mörg mikilvæg málefni sem eiga ekki síður erindi í dag en þegar verkið var samið, en t.a.m. er fjallað um sorg, mismunun og útskúfun. En eins og í öðrum góðum ævintýrum fær það góðan endi.
Leikarar og aðstandendur sýningarinnar fengu frábærar móttökur á frumsýningunni í gær. Önnur sýning er miðvikudaginn 14. október og verður verkið síðan sýnt um helgar á meðan aðsókn leyfir. Sýningar fara fram í leikhúsinu við Austurmörk í Hveragerði og er miðasala á Tix.is. Fyrirspurnir og hópapantanir fara fram á midasala@leikhver.is.
