Sviðslistahópurinn Fullorðið fólk sýnir leikverkið Stelpur og strákar í leikhúsinu við Sigtún á Selfossi mánudaginn 30. maí
Verkið var frumsýnt í Gaflaraleikhúsinu í Hafnarfirði síðastliðinn miðvikudag en þetta er í fyrsta sinn sem verkið er flutt hérlendis á íslensku. Höfundur verksins er leikskáldið Dennis Kelly sem margir þekkja fyrir verk sín DNA og Mathilda.
Stelpur og strákar var fyrst sett upp í London árið 2018 við einróma lof gagnrýnenda, en í verkinu er skyggnst inn í líf, sorgir og sigra aðalpersónunnar, Óvænt stefnumót á flugvelli leiðir af sér ákaft, ástríðufullt og sjóðandi heitt ástarsamband. Fljótlega tekur hið eðlilega fjölskyldulíf við; kaupa hús, eignast börn, jöggla ferlunum – fjölskyldan þeirra er venjuleg fjölskylda. Þar til heimurinn þeirra fer að molna í sundur og hlutirnir taka óhugnanlega stefnu. Verkið er í senn kómískt og tragískt.
„Ég hitti manninn minn í boarding-röðinni á leiðinni í EasyJet flug og ég verð að segja að mér líkaði strax illa við hann.“
Það er Björk Guðmundsdóttir sem fer með einleik í verkinu og er leikstjórn í höndum Önnulísu Hermannsdóttir. Björk útskrifaðist sem leikkona frá Listaháskóla Íslands 2021. Björk situr sem formaður í stjórn Improv Ísland og hefur tekið þátt í ýmsum sviðslista tengdum verkefnum. Annalísa Hermannsdóttir er sviðshöfundur, leikstjóri og tónlistarkona sem útskrifaðist með BA gráðu í sviðslistum af sviðshöfundabraut LHÍ vorið 2021.
Verkefnið er styrkt af Menningar- og ferðamálanefnd Hafnarfjarðarbæjar og Uppbyggingarsjóði Vesturlands og miðasala er hafin á tix.is.
