Sara Mjöll Magnúsdóttir, jazz tónlistarkona frá Hellu, hefur verið á mikilli siglingu í íslensku jazz tónlistarsenunni á Íslandi undanfarið og hefur einnig verið að koma sér á framfæri í New York borg og nágrenni þar sem hún hefur átt heima síðustu 5 ár.
Sara sendi frá sér sitt fyrsta lag í vikunni sem heitir „Heima“. Innblástur lagsins er tilfinningin að hafa fest rætur í nýju landi eða nýjum stað, og línur óskýrast um hvar nákvæmlega sé „heima“.
„Ég hef átt heima erlendis lengi og átt mörg heimili, og það gefur verið ljúfsárt að upplifa að „heima“ sé ekki bara einn staður eða eitt land lengur, frekar tilfinning frekar en staður. Ég verð þó líklega alltaf „mest“ heima á Hellu,“ segir Sara í samtali við sunnlenska.is.
„Ég hef alltaf verið með mikla útþrá, og verið mér mikilvægt að ferðast og sjá heiminn. Í ferðalögum hef ég oft tengst nýjum stöðum sterkum böndum og þykir mjög vænt um til dæmis Kólumbíu þar sem ég eyddi einum mánuði í fyrra,“ bætir hún við.
Sara spilar á Hammond orgel sem er heldur óalgent hljóðfæri. Í tónlistinni sinni blandar Sara sínum jazzbakgrunni við lýrískar laglínur oftar en ekki undir norrænum áhrifum. Blús og soul áhrif eru heldur aldrei langt undan. Með henni spila nokkrir fremstu jazz tónlistarmenn Íslands; Jóel Pálsson á tenór saxófón, Andrés Thor Gunnlaugsson á gítar og Einar Scheving á trommur.
Sara útskrifaðist úr Tónlistarskóla FÍH og lauk síðan BM námi við William Paterson University í jazz píanó og orgelleik. Þaðan lá leið hennar í mastersnám í jazz tónsmíðum og útsetningum við sama háskóla.
Plata Söru, A Place to Bloom, kemur út í ágúst og verður fagnað með útgáfutónleikum á Jazzhátíð Reykjavíkur í Hörpu, laugardaginn 30. ágúst kl. 20:00.