Uppskeruhátíðin Haustgildi, menning er matarkista, verður haldin í fimmta sinn á Stokkseyri um næstu helgi, 6.-7. september.
„Haustgildi tvinnar saman menningarviðburði og framleiðslu og leggur áherslu á að bæði er menning og matarkista. Bókabæirnir austanfjalls hafa komið að bókmenntaviðburðum á Haustgildi seinustu ár og verður svo einnig í ár. Frekara samstarf og við fleiri bókmenntahátíðir er fyrirhugað og verður það samstarf kynnt nánar síðar,“ segir Pétur Már Guðmundsson, einn af aðstandendum hátíðarinnar, í samtali við sunnlenska.is.
Ljóðabók um Stokkseyri
Aðal viðburður Haustgildis í ár verður dagskrá sem haldin er í minningu Ísaks Harðarsonar. „Þegar Ísak dvaldi á Stokkseyri skrifaði hann meðal annars ljóðabókina Stokkseyri, sem verður aðalumfjöllunarefni þessa viðburðar. Bókin er uppfull af fallegum náttúrustemningum og lýsingum á ströndinni við Stokkseyri og áhrif þess á ljóðmælanda. Íbúar þorpsins koma líka fyrir og hugleiðingar höfundarins og samanburður Stokkseyrar við stórborgir heimsins. Þetta er einstök ljóðabók og það er stefnt á að bókin verði fáanleg á Haustgildi en hún hefur verið ófáanleg lengi.“
„Kristín Svava Tómasdóttir og Þórður Sævar Jónsson, ljóðskáld og félagar í Ísaksvinafélaginu, fjalla um ljóð Ísaks og höfundaferil hans. Hróðmar Ingi Sigurbjörnsson tónskáld samdi líka tónverk við ljóð bókarinnar og verður hluti þess tónverks flutt og Hróðmar mun fjalla um það hvernig það kom til að hann samdi tónverkið en hann hefur samið fleiri lög við ljóð Ísaks.“
Fleiri bókmenntaviðburðir eru á Haustgildi og sjö höfundar koma til Stokkseyrar í ár. Þetta eru þau Eiríkur Örn Norðdahl, Guðrún Hannesdóttir, Gunnar Randversson, Sandra B. Clausen, Brynja Hjálmsdóttir, Maó Alheimsdóttir og Vala Hauksdóttir. Upplestrar þessara höfunda verða á Brimrót, sem er til húsa í gamla félagsheimilinu á Stokkseyri, Gimli, Hafnargötu 1.
Innilegir tónleikar í kirkjunni
Það hefur líka skapast hefð fyrir því að hafa tónleika í Stokkseyrarkirkju á laugardagskvöldi þessa fyrstu helgi september. „Það hefur alltaf verið gott að geta lokið deginum á innilegum tónleikum í hlýlegu andrúmslofti Stokkseyrarkirkju.“
„Seinast spilaði Lay Low á þessum tónleikum og voru það afar vel heppnaðir og skemmtilegir tónleikar. Þetta ár erum við heppin að geta boðið uppá framúrskarandi djass. Ingibjörg Elsa Turchi bassaleikari, Hróðmar Sigurðsson gítarleikari og trommuleikarinn Sólrún Mjöll Kjartansdóttir eru frábærir fulltrúar nýrra strauma í djass heiminum á Íslandi. Ingibjörg og Hróðmar hafa víða fengið lofsamlega dóma um plötu sína +1.“
Tónleikar verða einnig á Brimrót á laugardaginn og sunnudaginn. „Á laugardaginn spila Synthea Starlight sem er einstakur synthapop dúett sem hefur verið að fá mikla spilun undanfarið. Á sunnudaginn kemur svo SiGRÚN og lokar dagskrá Haustgildis að þessu sinni en nýjasta plata hennar Monster Milk var meðal annars valin ein af plötum ársins 2024.“
Afslöppuð og fjölskylduvæn hátíð
Gallerí á Stokkseyri verða líka opin og bjóða gestum upp á að skoða það sem þau hafa uppá að bjóða. „Gallerý Svartiklettur, Gussi gallerý, Gimli gallerý og Heba keramík. Það verður líka boðið upp á framleiðslu úr nágrenninu, kartöflur, rófur og harðfisk og fleira á Draugabarnum í menningarverstöðinni Hólmaröst.“
„Haustgildi – menning er matarkista er uppskeruhátíð menningar og framleiðslu en aðalmarkmið hátíðarinnar er að vera afslappaður og fjölskylduvænn vettvangur þar sem gestir geta notið viðburða í fallegu umhverfi Stokkseyrar. Notið viðburða af ýmsu tagi og átt góða stund í rólegheitunum við ströndina í Árborg,“ segir Pétur að lokum.