Bæjarhátíðin Hamingjan við hafið hófst 2. ágúst og nær hápunkti á stórtónleikum laugardagskvöldið 6. ágúst. Það er mikið búið að vera um að vera í Hamingjunni síðustu daga og má þar nefna sundlaugapartý, harmonikkuball á 9unni, garðtónleikar um allan bæ í samstarfi við Hljómlistafélag Ölfuss og fleira.
Í kvöld, föstudag, verður hverfapartý í gömlu bræðslunni þar sem hverfin bjóða upp á pálínuboð og tónlistaratriði í ævintýranlega vel skreyttu rými auk þess sem hinn eini sanni Jarl Sigurgeirsson stjórnar bræslusöng af sinni alkunnu snilld. Eftir að hann hefur sungið sitt síðasta er komið að árlegu körfupartýi Þórs í Versölum (aðgangseyrir).
Á laugardaginn verður þétt dagskrá fyrir börnin, Leikhópurinn Lotta, leikvöllur með opnum efnivið, nerf völlur, vatnaboltar, hoppukastalar og ungsirkusinn sem verður með vinnusmiðjur, sýningu og fleira. Ekkert af þessu kostar krónu og því aðgengilegt öllum.
Afmælistónleikar Þorlákshafnar
En eins og áður sagði nær hátíðin hápunkti með stórglæsilegum tónleikum sem settir voru saman að tilefni 70 ára afmælis Þorlákshafnar síðasta sumar en voru færðir um ár út af veirunni heimsfrægu. Á tónleikunum koma fram m.a. Bassi Maraj, Reykjavíkurdætur, hljómsveitin Albatross ásamt gestum sem eru Jónas Sig, Ragga Gísla, Lay Low, Júlí Heiðar, Anna Magga og Emilía Hugrún. Rúsínan í pylsuendanum er svo Lúðrasveit Þorlákshafnar og Fjallabræður sem stíga á svið þegar fjörið nær hámarki rétt áður en kveikt verður í flugeldasýningunni.
Matarvagnar verða á staðnum frá kl. 18 um það leiti sem Dj EJ stígur á svið og strax á eftir honum eru heimahljómsveitirnar Sunnan 6 og Moskvít sem sjá um að hita mannskapinn vel upp áður en Bassi Maraj stígur á svið. Þá er enn ónefndur leynigesturinn sem má segja með sanni að sé lifandi goðsögn. Tónleikarnir fara fram í Reiðhöll Guðmundar.
Þegar flugeldasýningin er búinn hefst hamingjuballið í Versölum þar sem Jónsi og Unnur Birna halda uppi fjörinu ásamt stórkostlegri hljómsveit (aðgangseyrir).
Verið hjartanlega velkomin til Þorlákshafnar.