Bæjarhátíðin Hamingjan við hafið hefst í Þorlákshöfn í dag og stendur hún fram á sunnudag. Framundan eru því fimm dagar af gleði, menningu og ógleymanlegum viðburðum.
Hátíðin hefst í dag með sýningunni Litalandi með Leikhópnum Lottu. Síðan verður fjölbreytt dagskrá alla vikuna. Gestir geta meðal annars tekið þátt í leikjum, froðurennibraut, hverfafótbolta, sundlaugarpartýi, menningargöngu, pub quizi og einstakri gusuupplifun Fjörugufunnar.
Það verður sannkallaður fimmtudagsfiðringur í garðinum hjá Róberti og Guðlaugu þegar þau bjóða í tónlistarveislu þar sem Hreimur Örn, Sóli Hólm, Júlí Heiðar, Jónas Sig, Árni þór, Tómas Jónsson, Steini Bjarka, Róbert Dan og Jón Guðfinnsson gleðja augu og eyru.
Á föstudagskvöldinu verður sannkölluð tónlistarveisla þegar Hr. Hnetusmjör, Emmsjé Gauti, Júlí Heiðar, Kristmundur Axel og Sveitamenn stíga á svið og sjá til þess að stemningin nái hámarki.
Laugardagurinn verður stór fjölskyldudagur í Skrúðgarðinum. Boðið verður uppá glæsilega barnadagskrá með Lalla töframanni, BMX Brós, Línu Langsokk og Sirkus Íslands, söngkeppni barnanna, street ball, hoppuköstulum, markaðsstemningu, matarvögnum og fjölmörgu öðru. Hestamannafélagið Háfeti býður börnum í heimsókn og Argh – heimagallerí Reykjabraut 19 býður heim í kósí kaffihúsastemmingu. Um kvöldið taka við stórtónleikar með Bríet, Stebba Hilmars, Audda og Steinda. Björgunarsveitin Mannbjörg verður með glæsilega flugeldasýningu í lok kvöldsins og síðan hefst ball ársins.
Á sunnudeginum verður svo Opna Hamingjumótið í golfi hjá Golfklúbbi Þorlákshafnar.