Söngkonan Fríða Hansen frá Leirubakka í Landsveit hefur sent frá sér nýtt lag sem nefnist Happy Place.
„Lagið er búið að fá að gerjast í nokkur ár. Þetta er svona melló-, popp-, sumar-, gleði-, ástarballaða einhvers konar. Og er svolítið svona draumkennt lag,“ segir Fríða í samtali við sunnlenska.is.
„Ég var einhvern tímann að horfa á sjónvarpið og datt ofan í hámhorf eins og ég geri stundum. Í þessari þáttaröð var introið þannig að það var mynd af hönd og út úr litla fingrinum var rauður þráður og þráðurinn lengdist og lengdist á meðan það var verið að skrifa textann og að lokum tengdist þráðurinn í litla fingur á annarri hendi.“
„Ég var svo forvitin og fór að skoða þetta og þá kom í ljós að þetta er japönsk kenning sem segir allir eigi sér sálufélaga einhvers staðar á jörðinni og við erum tengd þessum sálufélaga ósýnilegum þræði. Sama hversu langt þráðurinn þarf að teygjast og hlykkjast og lengjast þá slitnar hann aldrei. Merkingin er náttúrulega sú að við munum alltaf hitta þann sem við eigum að hitta. Mér fannst þetta svo dásamlega fallegt. Þannig að já, lagið spratt upp frá þessu.“
Fjögurra ára gerjun
Halldór Gunnar Pálsson, Fjallabróðir, vann lagið með Fríðu en þau hafa áður leitt saman hesta sína. Halldór kom svo inn sem meðhöfundur að laginu. „Lagið varð eiginlega til á einum degi og fékk svo að gerjast í fjögur ár og nú erum við hér. Ég fékk að frumflytja lagið á Bylgjunni 1. maí. Það var nú svolítið skemmtilegt. Viðtökurnar við laginu hafa verið mjög góðar.“
Þess má geta að í fyrra sendi Fríða frá sér lagið Það var komið sumar sem fjallað um sumarið sem hætti við að koma. Eins og flestir muna þá kom ekkert almennilegt sumar í fyrra og hafa einhverjir kennt laginu hennar Fríðu um. Ætla má að nýja lagið muni því færa landsmönnum gleðistundir.