Hin árlega tónlistarhátíð, Englar og menn í Strandarkirkju í Selvogi hefst sunnudaginn 5. júlí næstkomandi með tónleikum kl. 14.
Á opnunartónleikum hátíðarinnar koma fram Björg Þórhallsdóttir sópran, sem er jafnframt stofnandi og listrænn stjórnandi hátíðarinnar, Kristín Sveinsdóttir mezzósópran, Elísabet Waage hörpuleikari, Hrefna Berg Pétursdóttir fiðluleikari og Hilmar Örn Agnarsson organisti.
Yfirskrift tónleikanna er Gullregn og gersemar en á efnisskránni eru ýmsar þekktar innlendar sem erlendar gersemar úr heimi tónlistarinnar. Þar má finna tónskáld eins og Sigfús Einarsson, Markús Kristjánsson, Sigfús Halldórsson, Pál Ísólfsson, Grieg, Strauss, Mendelssohn-Bartholdy, Mozart og fleiri.
Aðgangseyrir er 5.000 krónur en 4.500 fyrir ellilífeyrisþega og miðasala er við innganginn. Að loknum tónleikum gefst tónleikagestum tækifæri á að kaupa úrvals kaffiveitingar hjá Guðrúnu í Pylsuvagninum.
Tónlistarhátíðin fer fram í júlímánuði og eru tónleikar alla sunnudaga kl. 14. Þetta er fimmtánda starfsár hátíðarinnar. Margir koma um langan veg á tónleika enda bera margir hlýjar taugar til Strandarkirkju, sem er þekkt áheitakirkja og þar þykir vera sérstakur kraftur til hjálpar og bænheyrslu. Kirkjan er einstaklega hljómfögur og því ljúft að njóta þar tónlistarflutnings og drekka í sig sögu og anda kirkju og staðar.