Færeyska tónlistarkonan Guðrið Hansdóttir kemur til Íslands nú í mánuðinum og heldur níu tónleika í hringferð um landið dagana 20.–29. október. Tilefnið er útgáfa sjöundu hljóðversplötu hennar, Sýrublað, sem kom út í vor og hefur fengið góðar viðtökur.
Í hringferðinni heldur Guðrið tvenna tónleika á Suðurlandi, hringferðin hefst í Blómaborg í Hveragerði 20. október og síðan verður hún á Midgard á Hvolsvelli 28. október.
Platan er unnin af Høgna Lisberg. Hún sveiflast milli lágstemmds þjóðlagapopps og draumkennds indípopps, sem Guðrið er þekkt fyrir. Sjálf segir hún tónlistina vera „eins og að bíta í súrublað – ferska, stökka, græna og örlítið súra“. Meðal áhrifavalda hennar eru Joni Mitchell, Kate Bush og Aldous Harding.
Guðrið hefur verið áberandi í færeysku og norrænu tónlistarlífi frá aldamótum, bæði ein síns liðs og í rafpopp-dúettinum BYRTA. Hún hefur komið fram á hátíðum á borð við Iceland Airwaves, SXSW, SPOT og By:larm. Fyrri plata hennar, Gult myrkur, var valin plata ársins á færeysku tónlistarverðlaununum.
Með henni á sviðinu eru Høgni Lisberg, Vinjar Egilsnes Petersen og Ólavur Gaard, á gítar, trommur og hljómborð.
