Guðjón Halldór sveitarlistamaður Rangárþings eystra

Guðjón Halldór Óskarsson. Ljósmynd/hvolsvollur.is

Guðjón Halldór Óskarsson í Miðtúni í Hvolhreppi hefur verið útnefndur sveitarlistamaður Rangárþings eystra 2020.

Guðjón Halldór hlýtur þessa viðurkenningu fyrir óeigingjörn störf sín við að byggja upp öflugt tónlistarlíf í Rangárþingi og að miðla þekkingu sinni og reynslu til nemenda á öllum aldri. Guðjón Halldór er kennari við Tónlistarskóla Rangæinga ásamt því að stjórna m.a. Karlakór Rangæinga, Öðlingunum og Kammerkór Rangæinga. Hann er einnig organisti og stjórnandi kirkjukóra í nokkrum kirkjum í Rangárvallasýslu.

Guðjón Halldór hefur einnig tekið þátt í hinum ýmsu verkum sem sett hafa verið upp og flutt síðastliðin ár og ekki má gleyma hans hlut í því að gleðja landann á Covid tímum þar sem hann sá um píanóleik þegar þær Miðtúnssystur sungu fyrir alþjóð gegnum netið.

Harpa Mjöll Kjartansdóttir, formaður menningarnefndar Rangárþings eystra, afhenti Guðjóni Halldóri viðurkenningarskjal og blómvönd í dag af þessu tilefni.