Kór Fjölbrautaskóla Suðurlands fagnaði í dag útgáfu á tveimur smáskífum með frábærum útgáfutónleikum í Skálholtsdómkirkju.
Skífurnar komu út í dag og þær má finna á öllum helstu streymisveitum, svosem á Spotify. Önnur skífan inniheldur þrjú lög sem kórinn tók upp í vetur og hin geymir upptökur frá söng kórsins árið 2010.
„Við héldum æfingadag í Gunnarshólma í Austur-Landeyjum í byrjun mars og tókum upp þrjú lög. Seinna í útgáfuferlinu bættust við upptökur sem kórinn hafði gert fyrir nákvæmlega fimmtán árum síðan. Karl Þór Þorvaldsson dustaði rykið af þeim upptökum núna þannig að úr urðu tvær þriggja laga smáskífur,“ segir Dýrleif Nanna Guðmundsdóttir, formaður Kórs FSu, í samtali við sunnlenska.is.
Kórinn bauð upp á fjölbreytta dagskrá á tónleikunum í dag og einnig komu fram fyrrum kórfélagar, þau Jóhanna Ómarsdóttir og gítarleikarinn Eyþór Ingi Eyþórsson og fluttu tvö af lögunum sem kórinn tók upp árið 2010.
„Það var mjög mjög gaman þegar tvær kynslóðir af kórfélögum komu saman í dag. Það var uppáhalds atriðið mitt á tónleikunum þegar við sungum „Ég veit að þú kemur“ með Jóhönnu,“ segir Dýrleif.
Skemmtilegasti áfanginn
Dýrleif Nanna endurvakti kórinn þegar hún hóf nám í FSu fyrir þremur árum og þarf að kveðja kórinn eftir útskrift í vor.
„Það er mjög góður endir á mínum ferli með kórnum að búa til upptökur með honum. Þetta var mjög skemmtilegt verkefni og gaman að varðveita starf kórsins svona. Það verður líka gaman að hlusta á þetta seinna, þegar maður getur ekki lengur æft með uppáhalds kórnum sínum. Kór FSu er skemmtilegasti áfangi sem ég hef tekið í skólanum, enda var ég í honum í sex annir,“ segir Dýrleif Nanna að lokum.
