Sjómannadagurinn verður haldinn hátíðlegur í Þorlákshöfn helgina 5.-6. júní. Að þessu sinni er einnig verið að fagna 70 ára afmæli Þorlákshafnar en Sjómannadagshelgin er fyrsta afmælishelgin af mörgum. Afmælisdagskrá verður fyrstu helgi hvers mánaðar út árið.
Dagskráin hefst á laugardagsmorgun kl. 11 þegar ný sögusýning opnar í römmunum við Selvogsbraut. Sögusýningin er nýstárleg, gamansamar myndlýsingar í bland við létta sagnfræði og hversdagssögur. Heiðurinn af þessari myndlistarsýningu eiga hjónin Ágústa Ragnarsdóttir og Þórarinn F. Gylfason.
Klukkan 13 hefst dagskrá við bryggju, að þessu sinni án skemmtisiglingar en vegna COVID er það ekki hægt þetta árið. Á bryggjunni verður ýmis afþreying bæði á sjó og landi. Þar má nefna hlaupabraut í sjó og sjóbretti sem áhugasamir, svellkaldir einstaklingar geta prófað. Söngkeppni barnanna verður haldin þar sem börn á öllum aldri geta látið ljós sitt skína og körfuknattleiksdeild Þórs verður með hinar einu sönnu humslur til sölu og það vita allir sem hafa smakkað að maður lætur þær ekki framhjá sér fara.
Hoppukastalar af ýmsum stærðum og gerðum verða á sínum stað og fiskar og önnur furðudýr úr sjónum verða til sýnis. Björgunarsveitin Mannbjörg sér um að allt fari fram á öruggan hátt.
Sjómannadagurinn, sunnudagurinn 6. júní, hefst á hefðbundinn hátt þegar messað verður í Þorlákskirkju og að þessu sinni er einnig fermingarmessa. Dagskrá hefst Skrúðgarðinum með laser tag klukkan 11:30 og þá verður einnig blásið í hoppukastalana sem verða í boði yfir daginn. Um hádegi verður kveikt upp í grillum og íbúar eru hvattir til að koma með pylsur með sér og grilla og borða saman hádegisverð undir harmonikkuleik og skemmtiatriðum.
Á sviði koma fram söngkonurnar Elísabet Davíðsdóttir og Emilía Hugrún Lárusdóttir ásamt sigurvegara söngkeppni barnanna frá því deginum áður. Þar verða einnig sögur sagðar af sjó og landi af útgerðarmanninum Einari Sigurðssyni og fiskvinnslukonunni Sigríði Stefánsdóttur.
Sjómannadagskaffi Björgunarsveitarinnar Mannbjargar verður á sínum stað, í Versölum. Vegna COVID ætla þau að hafa opnunartímann lengri og hefja kaffisölu kl. 13 og verða með heitt á könnunni til kl. 17. Fólk er hvatt til að fá sér kaffi og kræsingar og styðja þannig við bakið á björgunarsveitarstarfi Mannbjargar sem verður einnig með tækin sín til sýnis fyrir utan ráðhúsið.
Alla helgina verða bílskúrssölur víða um bæ og blómamarkaður í Skrúðgarðinum.