Í Listasafni Árnesinga hafa nú verið settar upp margar perlur íslenskrar listasögu. Öll listaverkin eru úr stofngjöf Ragnars í Smára til Listasafns ASÍ en sýningin í Hveragerði verður opnuð á morgun, föstudaginn 14. júní kl. 17:30.
Sýningin er samstarfsverkefni Listasafns ASÍ og Listasafns Árnesinga og sýningarstjóri er Kristín G. Guðnadóttir. Samtímis sýningunni gefur Listasafns ASÍ út veglega bók með sama nafni um stofngjöf Ragnars.
Gjöf til samtaka íslenskra erfiðismanna
Í bréfi til Alþýðusambands Íslands þann 17. júní 1961 skrifar Ragnar Jónsson: „Myndir þessar hef ég ákveðið að gefa samtökum íslenskra erfiðismanna – fyrir þeirra hönd Alþýðusambandi Íslands – í minningu Erlends Guðmundssonar, Unuhúsi.“ Af þeim 147 listaverkum eftir 35 listamenn, sem Ragnar gaf og teljast til stofngjafar Listasafns ASÍ eru 52 þeirra til sýnis í Listasafni Árnesinga. Að sögn Ragnars er kjarni safnsins verk eftir „fimm þekktustu listmálarana“, sem að hans mati voru þeir Ásgrímur Jónsson, Jóhannes S. Kjarval, Jón Stefánsson, Gunnlaugur Scheving og Þorvaldur Skúlason.
Á sýningunni leitast Kristín við að fanga þá meginhugsun sem lá að baki söfnunarstefnu Ragnars og spegla sýn hans á íslenska listasögu. Hún skiptir sýningunni niður í þrjá kafla þar sem fyrst er að sjá upphafin og oft alvöruþrungin landslagsmálverk, því næst portret myndir af nokkrum þeirra listamanna sem eiga verk á sýningunni og að lokum er áherslan á upplausn formsins og sprengikraft litanna.
Gjafmildur Eyrbekkingur
Þessi gjafmildi athafnamaður Ragnar Jónsson fæddist á Eyrarbakka árið 1904 og ólst þar upp uns hann fluttist 16 ára til Reykjavíkur. Að loknu verslunarprófi tveimur árum síðar hóf hann störf hjá smjörlíkisgerðinni Smára sem hann var síðar kenndur við, enda varð hann fljótlega hluthafi í verksmiðjunni. Í bókinni Gjöfin til íslenzkrar alþýðu skrifar Kristín m.a.: „Dugnaður hans og atorka beindist þó ekki einvörðungu að kaupskap, því fljótlega eftir komuna til Reykjavíkur varð hann upptendraður af menningaráhuga, enda alinn upp á Eyrarbakka þar sem menningarlíf stóð í miklum blóma. Þar var sungið, leikið og spilað á hljóðfæri og á æskuheimili Ragnars skipuðu bókmenntir auk þess veglegan sess.“
Sýningin opin til 15. september
Sýningin í Listasafni Árnesinga verður opnuð föstudaginn 14. júní kl. 17:30 og við opnun mun Drífa Snædal forseti ASÍ ávarpa gesti og Vignir Þór Stefánsson leikur jazz af fingrum fram á píanó. Það eru allir velkomnir á opnun og aðgangur að safninu er ókeypis. Sýningin mun standa til 15. september.