Þrátt fyrir að votviðri hafi sett svip sinn á hluta Kótelettuhelgarinnar létu gestir það ekki hafa áhrif á sig. Þúsundir lögðu leið sína á Selfoss um helgina þar sem Kótelettan BBQ & Music Festival bauð upp á glæsilega dagskrá með tónleikum, grillhátíð og fjölskylduskemmtun.
Að sögn skipuleggjenda hafði veðrið hvorki teljandi áhrif á aðsókn né upplifun gesta og stemningin var frábær frá upphafi til enda.
„Við sitjum fyrst og fremst eftir með gríðarlegt þakklæti. Til allra þeirra gesta sem komu og sköpuðu þessa einstöku stemningu, til listafólksins sem lagði allt sitt í hverja framkomu og ekki síst til okkar magnaða starfsfólks og sjálfboðaliða sem vinna ótrúlegt starf á bak við tjöldin og láta svona stóra hátíð ganga eins vel og raun ber vitni,“ segir Einar Björnsson, stofnandi Kótelettunnar.
„Það er mér líka bæði ljúft og skylt að þakka lögreglunni á Suðurlandi, Grími Hergeirssyni og öllum viðbragðsaðilum sem ár eftir ár tryggja öryggi gesta okkar. Að baki svona viðburði liggur gríðarleg ástríða, fagmennska, kunnátta og reynsla og fyrir það eigum við þeim öllum miklar þakkir.“
Grillhátíðin í Sigtúnsgarði í gær tókst afar vel og dró að sér mikinn fjölda gesta sem nutu fjölbreyttrar dagskrár fyrir alla fjölskylduna. Um kvöldið lauk síðan Kótelettan Music Festival með glæsibrag þar sem meðal annars komu fram Páll Óskar, FM95BLÖ, Birnir, Klara Einars, Emmsjé Gauti, Koppafeiti og Love Guru. Að sögn skipuleggjenda fór dagskráin fram úr væntingum og tónleikagestir skemmtu sér fram á nótt.