Í Eyvindartungu í Laugardal er miðstöð Gullkistunnar sem er alþjóðlegur dvalarstaður fyrir skapandi fólk.
Þangað koma myndlistarmenn, rithöfundar, tónlistarmenn og fræðimenn víðsvegar að úr heiminum til að njóta næðis og starfa í fallegu umhverfi Laugardals.
Þeir dvelja þar að minnsta kosti mánaðarlangt og hefð er fyrir því að hver og einn sýni afrakstur sköpunar sinnar í lok dvalar.
Næstkomandi laugardag, 21. apríl kynnir svissneska listakonan Janine Gerber verk sín í vinnustofunni í Eyvindartungu milli kl. 16 og 18. Aðgangur er ókeypis og öllum heimill.
Myndin sem fylgir þessari frétt er tekin í síðustu viku þegar Katrín Jakobsdóttir, mennta- og menningarmálaráðherra, kom við í Eyvindartungu til skrafs og ráðagerða um starfsemi og framtíðaráætlanir Gullkistunnar. Á myndinni eru auk Katrínar, Gullkistukonurnar Alda Sigurðardóttir og Kristveig Halldórsdóttir og svissneska listakonan Janine Gerber.
Frekari upplýsingar um starfsemi Gullkistunnar er að finna hér.