Í byrjun janúar hóf Leikfélag Selfoss æfingar á leikritinu Bót og betrun eftir Michael Cooney. Stefnt er á frumsýningu síðustu helgina í febrúar þó endanleg dagsetning liggi ekki fyrir.
Bót og betrun segir frá Eric Swan sem grípur til bótasvika þegar hann missir vinnuna. Hins vegar fer svindlið úr böndunum og kemst Eric að því að stundum er auðveldara að komast á bætur en af þeim þegar boltinn er einu sinni farinn að rúlla.
Leikstjóri er Jón St. Kristjánsson og með aðalhlutverkin fara Guðmundur Karl Sigurdórsson og Stefán Ólafsson en alls taka tíu leikarar þátt í uppfærslunni.
Lilja Jóna Halldórsdóttir, fjölmiðlafulltrúi sýningarinnar, segir að Bót og betrun sé gamanleikur eins og þeir gerast bestir. „Þetta er hefðbundin farsi með misskilningi og flækjum af öllu tagi og pínlegum aðstæðum eins og efnið ber með sér,“ segir Lilja. „Verkið á erindi við alla sem hafa gaman af gleði og glaum og hrossahlátri.“