Fyrrum félagar úr Unglingakór Selfosskirkju koma saman á ný og halda tónleika í Selfosskirkju sunnudaginn 20. september kl. 17:00. Stjórnandi er Margrét Bóasdóttir og meðleikari Sólveig Anna Jónsdóttir.
Þegar fyrrum og núverandi kórfélagar sungu saman í tilefni af 70 ára afmæli Selfosskirkju fyrr á þessu ári rifjuðust upp fyrir þeim gömul kynni við félagana og tónlistina sem þau voru svo heppin að fá að kynnast og njóta þess að syngja á unglingakórsárunum. Í framhaldinu ákváðu nokkrar úr hópnum að kalla gömlu félagana saman og skipuleggja endurfundi og æfingabúðir í Skálholti. Þar á að dusta rykið af gömlum perlum og stilla raddirnar saman á ný áður en hópurinn stígur á kórpallana í Selfosskirkju.
Húmor, agi og fallegur söngur
Rætur starfsins má rekja aftur til ársins 1988 þegar Glúmur Gylfason stofnaði barnakór við Selfosskirkju. Glúmur var laginn við að ná til ungra söngvara og þurfti sjaldnast mörg orð. Hann hafði einstakt lag á að kenna söngtækni með húmor og látbragði og skapa þann aga sem nauðsynlegur er til að ná fram fallegum söng.
Stefán Þorleifsson gekk til liðs við Glúm árið 1992 og færði starfinu ekki síður dýrmætt veganesti. Stefán er mikill grallari og grínisti og átti auðvelt með að kveikja sönggleði í hópnum.
„Það sem stendur upp úr er þetta þrótt- og kraftmikla starf hans Glúms, hvað hann eyddi miklu púðri í þetta og lá jafnvel á gólfinu með kórnum og veltist um þegar hann var að kenna leiki eða söng – rétt eins og hann væri einn af kórnum. Það stendur upp úr og svo tónleikarnir með Jóni Stefáns og Kór Langholtskirkju og eins ferðin til Skotlands“ rifjar Stefán Þorleifsson upp.
Stefán vitnar þarna til flutnings Unglingakórsins á Gloria eftir Antonio Vivaldi ásamt Kór Kórskóla Langholtskirkju og kammersveit sem eru til marks um það metnaðarfulla starf sem byggt hafði verið upp aðeins sex árum frá stofnun barnakórsins. Kórinn flutti einnig Missa brevis eftir Haydn. Bæði verkin eru á latínu og er kórfélögum minnisstætt á hve líflegan hátt Glúmur útskýrði textana og tengsl hans við önnur tungumál svo að þau skildu betur hvað þau væru að syngja.
Öflugt kórstarf vex og dafnar
Árið 1997 tók Margrét Bóasdóttir við öflugu kórstarfi sem dafnaði enn frekar undir hennar stjórn. Meðal hápunkta á því tímabili var flutningur kórsins á Ceremony of Carols eftir Benjamin Britten, þátttaka í jólatónleikum Sinfóníuhljómsveitar Íslands og söngur á opnun sýningar á íslenskum handritum í Library of Congress í Washington. Þá tók kórinn einnig þátt í alþjóðlegri tónlistarhátíð á Spáni og landaði þar fimmta sæti í keppni kvennakóra.
Í tónleikagagnrýni frá þessum tíma var Margréti lýst sem „slyngum kórstjóra“. Hljómur kórsins þótti einstaklega heilsteyptur og fallegur, jafnvægi milli radda mjög gott og söngurinn bæði hreinn, músíkalskur og blæbrigðaríkur. Kórfélagar lýstu því í viðtölum frá þessum tíma að söngurinn væri gefandi og þroskandi áhugamál og að félagsskapurinn væri einstakur. Þær sögðu jafnframt að maður gæti jafnvel orðið háður því að syngja í kór. Sú lýsing virðist enn eiga vel við, enda hefur sönggleðin nú leitt hópinn saman á ný.
Dýrmætt veganesti og stuðningur
Fyrrum kórfélagar vilja með tónleikunum jafnframt þakka Glúmi Gylfasyni og Stefáni Þorleifssyni fyrir þann góða grunn sem þeir lögðu og Margréti Bóasdóttur fyrir að taka við honum, efla starfið og leiða kórinn áfram í gegnum ótal æfingar, tónleika og ævintýri. Þá er enn ógetið hins ötula starfs sem bæði Jörg Erich Sondermann og Edit Molnár unnu í þágu barna- og unglingastarfs við Selfosskirkju og Edit sinnir enn af einstakri alúð og fagmennsku.
Þá hljóta Héraðssjóður Suðurprófastsdæmis og Sveitarfélagið Árborg sérstakar þakkir fyrir veittan stuðning.
Tónleikarnir hefjast kl. 17:00 sunnudaginn 20. september og eru allir velkomnir.