Í september hefjast myndlistarnámskeið fyrir ungmenni og fullorðna í Selinu við Engjaveg 48 á Selfossi.
Námskeiðin eru á vegum ARRA stúdíó en það er rekið af myndlistarkonunum og hönnuðunum Ragnheiði Ástu Valgeirsdóttur og Amy Alice Riches.
„Þessi námskeið henta þeim sem hafa alltaf viljað læra að teikna en aldrei gefið sér tíma til þess, eða eru að taka sín fyrstu skref í teikningu. Þau sem eru lengra komin eða vilja rifja upp grunnatriði klassískar teikningar eru einnig velkomin, þar sem við aðlögum efnið að getu hvers og eins,“ segir Ragnheiður í stuttu samtali við sunnlenska.is.
„Markmiðið er að þjálfa góðan grunn í teikningu, skilning á efninu og öryggi til þess að teikna á eigin vegum. Einnig er mikilvægt að finna gleðina og núvitundina sem teikning getur gefið okkur í listinni og daglegu lífi,“ bætir Ragnheiður við.
Námskeiðið Teikning I fyrir fullorðna hefst 9. september og stendur til 28. október. Kennt er alla miðvikudaga frá klukkan 19:00-22:00. Teikning I er fyrir 13-16 ára og hefst 10. september og stendur til 29. október. Kennt er alla fimmtudaga frá klukkan 16:30-18:30. Bæði námskeiðin spanna átta vikna tímabil.
Frekari upplýsingar um námskeiðin, verð og skráningu má finna á www.arra.is.
