Frumsýning í Hveragerði á föstudaginn

Föstudaginn 27. janúar frumsýnir Leikfélag Hveragerðis leikritið „Naktir í náttúrunni“ sem byggt er á kvikmyndinni „The Full Monty“.

Jón Gunnar Þórðarson leikstjóri hefur samið leikgerðina og staðfært hana að Hveragerði og nágrenni. Inn í verkið fléttast meðal annars Eden og Tívolíið sáluga, Kjörís, Heilsustofnun og Hótel Örk, svo eitthvað sé nefnt, en einnig kjararáð og búvörusamningar og fleira.

Leikritið segir frá nokkrum garðyrkjumönnum og fleirum sem ákveða að auka tekjurnar með því að koma fram og sýna dans í þeim anda, sem myndin sem fylgir fréttinni sýnir. Sérstaklega bera þeir hag félaga síns fyrir brjósti þar sem hann er atvinnulaus og á það á hættu að missa samband við son sinn borgi hann ekki meðlagið.

Leikarar eru átján talsins og þar á meðal allnokkrir sem ekki hafa leikið með Leikfélagi Hveragerðis áður.

Leikfélag Hveragerðis er 70 ára á þessu ári og hafa verið settar upp sýningar á hverju ári frá upphafi, ein eða fleiri.