Fyrsta uppsetning Leikfélags Eyrarbakka, Einu sinni á Eyrarbakka, verður frumsýnd í Byggðasafni Árnessinga á Eyrarbakka kl. 20:00.
Eins og sunnlenska.is greindi frá í vetur var Leikfélag Eyrarbakka endurvakið af áhugasömum íbúum í þorpinu en áður hafði leikfélag ekki starfað á Bakkanum síðan á sjötta áratug síðustu aldar.
Leiksýningin Einu sinni á Eyrarbakka samanstendur af nokkrum leikþáttum sem allir tengjast Eyrarbakka á einn eða annan hátt.
Óhugur eftir Guðmund Brynjólfsson Lífsbaráttan í sjávarþorpum Íslands var um aldir hörð og sambúð manns og sjávar ströng. Eyrarbakki stóð verr en margur annar staðurinn vegna vondra lendingarskilyrða í brimasamri fjörunni. Það hindraði þó ekki dugmikla sjósóknara, þeir drógu gull úr greipum Ægis, en guldu oft dýru verði. Heima biðu konur og börn í skelfilegri óvissu. Leikþátturinn Óhugur bregður upp svipmynd úr alþýðuhúsi á Eyrarbakka um aldamótin 1900. Þar fylgjumst við með þremur ættliðum kvenna bíða þess sem verða vill.
Eyrarbakkasyrpa eftir Huldu Ólafsdóttur eru fjórir leiknir þættir, þar á meðal leikgerð upp úr bók Eyrúnar Ingadóttur um Þórdísi ljósmóður, ásamt rímuðum brag sem tengir þættina saman. Þættirnir fjalla um fólk sem lifði og starfaði á Eyrarbakka frá miðri 19. öld og eitthvað fram á þá 20. Koma faktorshjónanna Guðmundar Thorgrimsson og Sylviu konu hans á Eyrabakka árið 1847 markaði nýja tíma í sögu Eyrarbakka. Þau báru með sér nýja, ferska menningarstrauma frá Kaupmannahöfn og starfshættir verslunarinnar breyttust til batnaðar. Eugenia dóttir þeirra giftist Peter Nielsen sem tók við faktorsstöðinni af Guðmundi. Hún var lífið og sálin í félags- og líknarmálum þorpsins, formaður Kvenfélagsins í mörg ár eftir stofnun þess.
Myndbandið Lilja mín hannað af Sellu Páls fjallar um skáldað líf Lilju frá æsku á Eyrarbakka. Söngtexti eftir Sellu Páls. Lag eftir Norbert Schultze. Gerður Eðvarðsdóttir syngur.
Bíltúrinn eftir Sellu Páls. Þann 6. september 1944 brast Ölfusárbrú á Selfossi. Eftir það voru fólk og vörur ferjað yfir ána. 12. – 14. sept. hljóp það mikill vöxtur í ána að öll umferð yfir hana stöðvaðist og varð síðan mjólkurlaust á Eyrarbakka. Leikþátturinn Bíltúrinn hefst á Eyrarbakka 15. september 1944 þegar Þorsteinn er að leggja af stað í bíl sínum á Selfoss í von um að fá þar mjólk. Njörður og Lilja fá far með honum, en eitt og annað kemur upp á leiðinni.
Þrettán leikarar taka þátt í sýningunni en leikstjóri er Hulda Ólafsdóttir. Tónlistin er eftir Birki Örvarsson en söngtextar í Eyrarbakkasyrpu og í samsöngslögum eru eftir Huldu Ólafsdóttur.
Uppselt er á frumsýninguna á morgun en til að byrja með eru sýningar áætlaðar á laugardögum og sunnudögum út marsmánuð.