Dagana 29. til 31. maí heldur kórinn VOX Rangárþing tónleika í félagsheimilinu Hvoli á Hvolsvelli. Tónleikarnir bera yfirskriftina ÁST en eins og nafnið gefur til kynna þá fjalla þeir um ástina í öllum sínum myndum.
20% kórmeðlima af erlendum uppruna
VOX Rangárþing er líflegur sunnlenskur kór, skipaður um 50 söngvurum af ólíkum uppruna og þjóðernum. Margir þeirra höfðu litla sem enga reynslu af söng áður, en saman skapa þau einstaka sýningu þar sem tónlist, frásögn og tilfinningar fléttast saman.
VOX var stofnaður í apríl 2025 og hófust reglulegar æfingar í september sama ár. Það sem er gerir kórinn sérstakan er hátt hlutfall útlendinga í kórnum en um 20% kórmeðlima eru af erlendum uppruna. Svo skemmtilega vill til að það er einmitt sama hlutfall af útlendingum sem býr í Rangárþingi.
Kórinn gegnir mikilvægu hlutverki fyrir þennan hóp til að læra íslensku, aðlagast samfélaginu og eignast vini á svæðinu. Þrátt fyrir ólíka menningu og uppruna nær fólk að sameinast undir formerkjum tónlistarinnar.
Staður þar sem fólk kemur saman sem samfélag
Arilíus Marselínuson, stjórnandi kórsins, segir í samtali við sunnlenska.is að VOX sé ekki hefðbundinn kór, heldur öruggur staður þar sem allir eru velkomnir.
„Þú þarft ekki að kunna að syngja eða leika til að vera með okkur. VOX snýst í raun um fólk sem kemur saman sem samfélag og lærir að segja sögur saman í gegnum tónlist, leikhús og tilfinningar. Þetta er staður til að vaxa, til að prófa, til að mistakast á öruggan hátt og til að uppgötva hluti um sjálfan sig sem þú vissir kannski ekki að væru til staðar.“
Gábor Tengely, leikstjóri sýningarinnar, tekur undir orð Arilíusar. „Það sem gerir þetta sérstakt fyrir mér er að þetta varð sannarlega öruggur staður. Óháð menntun, bakgrunni, þjóðerni, sjálfsmynd, aldri eða einfaldlega hvar fólk er statt í lífi sínu – fólk kemur hingað sem það sjálft og myndar djúp vináttubönd. Sum okkar fundu vísi að fjölskylduböndum,“ segir Gábor og bætir því við að þeim sé innilega annt um fólkið sitt í kórnum.
Gabor segir það sé ótrúlega mikilvægt að það sé til kór eins og VOX. „Þegar ég kom til Íslands þekkti ég engan. Núna á ég vini — djúpa vináttu, fólk sem mér þykir mjög vænt um. Það breytir lífi manns. Og ég held ekki að þetta sé bara mín reynsla. Að búa langt frá heimilinu getur verið dásamlegt, en líka einmanalegt. Samfélag birtist ekki sjálfkrafa bara vegna þess að fólk býr á sama stað. Eitthvað verður að skapa tenginguna. VOX gerir það.“
Óhefðbundnir tónleikar
ÁST er ekki hefðbundnir tónleikar heldur ferðalag í gegnum mismunandi birtingarmyndir ástar: Gleði, þrá, sorg, tengsl og von. Á efnisskránni eru þekkt alþjóðleg lög og íslensk tónlist, útsett sérstaklega fyrir kórinn.
Sem fyrr segir er sýningin í leikstjórn Gábor Tengely en hann er þekktur fyrir sjónræna nálgun og störf sín í leikhúsi og brúðulist í Ungverjalandi. Kórstjórn og framleiðsla er svo í höndum Arilíusar Marselínussonar. Harpa Rún Kristjánsdóttir sér svo um listræna stjórnun og Sandra Rún Jónsdóttir sér um tónlistarstjórn. Með áherslu á stemningu, sjónræna upplifun og einlægni skapar VOX Rangárþing upplifun sem fer út fyrir hefðbundna kórtónleika.
Á staðnum verður boðið upp á úrval af léttum veitingum og óáfengum drykkjum, auk sérvalins varnings tengdum viðburðinum. Allur ágóði af tónleikunum fer í að styðja kórinn fyrir næsta tímabil og fjármagna sýningar í Tjarnarbíói í október.
Hægt er að kaupa miða á sýninguna hér.
