Í haust er boðið upp á fjórar sýningar á Listasafni Árnesinga. Áhugi á þeirri merkingarsköpun sem verður til í tengslum manneskju við umhverfi sitt er sameiginlegur snertiflötur milli sýninganna. Þegar landslag er skimað berst það áhorfandanum gegnum síu persónulegrar skynjunar og sjónarhorns. Það sama er uppi á teningnum þegar við hlýðum á tungumál eða upplifum lífið í hversdagsleika sínum. Sem túlkendur höfum við áhrif á það hvernig heimurinn birtist okkur.
Sýningin Tengsl II konur leiðir saman sex listakonur frá Íslandi og Austurríki – þær Huldu Vilhjálmsdóttur, Kristínu Gunnlaugsdóttur, Sigríði Rut Marrow, Birgit Graschopf, Ramonu Schnekenburger og Tönju Prušnik. Til sýnis eru fjölbreytileg verk, sprottin úr ólíkum reynsluheimum, sem eiga það m.a. sammerkt að hverfast um líkamleika og tengsl. Dreginn er fram þáttur líkamans í myndun tengsla við okkur sjálf, aðrar verur, guðleikann og umhverfið.
Weronika Balcerak og Lukas Bury, sem saman mynda listamannatvíeykið Austur-Íslendingar, bjóða upp á sýninguna Gullni hringurinn. Í henni er sjónum beint að túrisma í því skyni að skoða áhrif frásagna á umhverfisskynjun. Með beitingu ólíkra listforma afhjúpa listamennirnir hvernig þær sögur sem sagðar eru um landslag lita upplifun fólks af því.
Halldór Ragnarsson skoðar tungumálið í samhengi við sannleika og merkingu í sýningu sem ber titilinn Satt/ósatt. Tungumálinu er m.a. stillt upp sem yfirborði sem leynt getur á sér. Því er sömuleiðis stillt upp sem byggingu sem lesandi nemur bæði sjónrænt og upplifir tilfinningalega. Listamaðurinn sýnir hvernig merking orða liggur ekki aðeins í þeim sjálfum heldur mótast af athygli og lestri lesandans sjálfs.
Á safneignarsýningunni Þar sem landið hefst er boðið upp á samtal um landslagsmálverkið og þróun þess. Horft er til þess hve veigamiklu hlutverki landslag gegnir í lífum okkar og þeirrar merkingar sem við ljáum því. Þannig er landslagsmálverk ekki aðeins eftirlíking af umhverfi heldur vitnisburður um persónulega sýn listmálarans á það.
Í vídeóhorni eru einnig kynnt vídeóverkin Á mörkum heima og Sjónrænn vitnisburður eftir Katarzyna Zabłocka.
Sýningarnar opnar allar laugardaginn 12. september klukkan 15:00. Þann 13. september klukkan 13:00 verður boðið upp á listamannaspjall með listakonunum í sýningunni Tengsl II.