Hin árlega fjölskyldu- og menningarhátíð í Flóahreppi, Fjör í Flóa, verður haldin dagana 13.-16. maí.
„Það er mikil stemning í Flóahreppi þessa dagana fyrir hátíðinni. Að þessu sinni stendur hún frá miðvikudegi fram á laugardagskvöld,“ segir Sigrún Hrefna Arnardóttir, ein af skipuleggjendum hátíðarinnar, í samtali við sunnlenska.is.
Fjör í Flóa hefur verið haldið síðan árið 2005 en þá bjóða íbúar Flóahrepps gesti velkomna í hreppinn góða. Dagskrá hátíðarinnar í ár er fjölbreytt að vanda og ættu allir að finna eitthvað við sitt hæfi, alveg á sama hvaða aldri þeir eru.
Kvöldganga sem endar á kakóbarnum
„Það verður mjög spennandi kvöldganga hjá okkur á morgun. Í kvöld er nefndin að flytja kakóbarinn í Þorleifskot þar sem gangan endar og svo þarf að smyrja nesti fyrir göngugarpana,“ segir Sigrún Hrefna.
Mæting í kvöldgönguna er á hlaðið í Laugardælum klukkan 19:15. Þaðan verður gengið út í Laugardælaeyju og nýja brúarstæðið fyrir Ölfursárbrú skoðað. Gengið verður að golfskálanum við Svarfhól og hægt að velja lengri eða styttri leið til baka að Laugardælum. Laugardælakirkja verður opin gestum. Gönguferðin endar svo í Þorleifskoti þar sem boðið verður upp á brekkusöng og hressingu á kakóbarnum.
Fyrirtæki og fjölskyldur í Flóahreppi bjóða gesti velkomna á opin hús meðan á hátíð stendur og er hægt að sjá nánari upplýsingar um það hér.
Tónleikar og kosningavaka
Föstudagskvöldið 15. maí verður Kirkjukór Flóamanna með tónleika í Hraungerðiskirkju en tónleikarnir verða á léttu nótunum og aðgangur er ókeypis.
Laugardaginn 16. maí verður gengið til sveitarstjórnarkosninga í Félagslundi frá kl. 9:00- 20:00. Dagskráin hefst svo í Þingborg klukkan 12:00 og stendur hún til klukkan 16:30. Þar verður fjölbreytt dagskrá en meðal annars mæta Júlí Heiðar og Dísa og skemmta gestum á öllum aldri.
Kökubasar, vélasýning og glænýr ærslabelgur
Kvenfélögin í Flóahreppi verða með hinn margrómaða kökubasar, vöfflukaffi og fatamarkað. Ungmennafélagið Þjótandi, ásamt íþrótta-, æskulýðs- og menningarnefnd Flóahrepps, bjóða upp á fjölbreytta barna- og fjölskyldudagskrá þar sem allir finna eitthvað við sitt hæfi. Skólakórar Flóaskóla syngja vel valin lög.
„Vélasýningin verður glæsileg að vanda. Fergusonfélagið sýnir eldri vélar og einnig verður sölusýning á nýjum vélum. Spennandi og fjölbreyttir sölubásar, lifandi tónlist, hænsnabingó, loftboltar og glænýr ærslabelgur við Þingborg verður vígður. Hin geysivinsæla kökuskreytingarkeppni verður á sínum stað. Einnig verður hjólarallý og margt fleira,“ segir Sigrún Hrefna.
Kosningakvöldvaka hefst síðan í Þingborg klukkan 21. Veislu- og stemningsstjóri kvöldsins er Jói G. Aldurstakmark á kvöldvökuna er 18 ár.
Samvinnuverk margra frábærra einstaklinga
Sigrún Hrefna segir að mikill undirbúningur sé búinn að vera hjá menningarnefndinni síðustu daga.
„Það er mikið af frábæru fólki sem tekur þátt í undirbúningsvinnunni, enda í mörg horn að líta. Hátíðin verður sérlega fjölbreytt og spennandi að þessu sinni,“ segir Sigrún Hrefna ennfremur.