Bókabæirnir austanfjalls bjóða til fjölskylduritsmiðju sunnudaginn 18. október þar sem Þuríður formaður verður í aðalhlutverki.
Fjölskylduritsmiðjan fer fram í Brimrót, Hafnargötu 1 á Stokkseyri og hefst ritsmiðjan klukkan 14:00.
Þuríður formaður er ein eftirminnilegasta kona Íslandssögunnar. Þekkt fyrir kjark, sjálfstæði og dug í sjómennsku á tímum þegar fáar konur gegndu slíkum hlutverkum. Í ritsmiðjunni gefst fjölskyldum tækifæri til að kynnast þessari merku söguhetju og leyfa ímyndunaraflinu að njóta sín í skapandi skrifum.
Þátttakendur fá að spreyta sig á ritun, skapa eigin sögur og kanna hvernig hægt er að vinna með sögulegar persónur í gegnum bókmenntir. Markmiðið er að efla sköpunargleði, frásagnargleði og áhuga á bókmenntum hjá fólki á öllum aldri.
Fjölskylduritsmiðjan er hluti af starfi Bókabæjanna austanfjalls við að efla bókmenntalíf á Suðurlandi og skapa skemmtilegan vettvang þar sem kynslóðir geta komið saman, lesið, skrifað og skapað.
Hægt er að skrá sig með því að senda póst á bokaustanfjalls@gmail.com.