Það verður sannkölluð sumarstemning í miðbæ Selfoss á fimmtudagskvöld þegar svokallað Kósykvöld fer fram með fjölbreyttri dagskrá fyrir alla fjölskylduna.
Verslanir og veitingastaðir bjóða upp á veglega afslætti og á svæðinu verða fjölbreyttir viðburðir og skemmtanir fyrir gesti á öllum aldri. Frítt verður yfir allan daginn að leggja í bílastæði miðbæjarins.
Á torginu verður hægt að smakka fiskisúpu frá MAR Seafood og Fröken Selfoss býður upp á grill-smakk. Desertvagninn frá Groovís verður á svæðinu og Konungskaffi mætir með útibarinn. Fanta með glænýja Tutti Frutti bragðinu fyrir krakkana til að smakka. RedBull mætir með DJ-jeppann sem þeytir skífum frá 16:00 til 18:00.
Torfærubílarnir Green Thunder og Kúrekinn verða til sýnis og Bílaklúbbur Suðurlands mætir með glæsilega fornbíla sem sólin mun án efa láta skína enn meira.
Á sviðinu á torginu stíga tónlistarfólkið Fríða Hansen og Alexander Olgeirs á stokk milli kl. 18:00 og 20:00 með ljúfa tóna. Strax á eftir verður plötusnúður á vínbarnum Risinu, Miðbar býður upp á karaoke, nudd og tarot-spá, Motivo verður með Bigga trúbador frá 20:00.
Fyrir þá sem vilja leika sér verður hægt að spreyta sig í spike ball, risa Jenga, cornhole og jafnvel axarkasti á torginu frá kl. 15:00.
Það er því tilvalið að leggja leið sína í miðbæ Selfoss, versla með afslætti, borða góðan mat og taka þátt í fjölbreyttri dagskrá.