Hin árlega Jónsmessuhátíð verður haldin á Eyrarbakka um helgina. Hápunktur hennar er brennan í fjörunni á laugardagskvöld.
Síðdegis á föstudag verður kíló á Garðstúni og eftir það bingó á Stað. Bifreiðaklúbbur Suðurlands verður á svæðinu á föstudagskvöld og deginum lýkur með Kahoot í Rauða húsinu..
Á laugardagsmorgun býður Skógræktarfélag Eyrarbakka í morgunmat í Hallskoti, hátíðin verður svo sett í hádeginu á laugardag við Sjóminjasafnið og þar verður Brúðubíllinn með sýningu fyrir yngri kynslóðina. Eftir hádegi verða hátíðarhöld við Garðstún, frí andlitsmálun, Bakkahestar teyma undir börnum, slökkviliðið kemur í heimsókn, karamellum verður kastað, kjötsúpa í Rauða húsinu og Þjóðbúningafélagið og skátarnir verða á svæðinu, svo fátt eitt sé nefnt.
Opin hús verða víða. Hafdís Brands keramik verður með opið alla helgina, Ásdís og Guðmundur bjóða heim á pallinn á Háeyrarvöllum 6 síðdegis á laugardag, Harðardætur verða með handverksmarkað í Nýjabæ og heitt verður á könnuni í Gömlu kartöflugeymslunni þar sem ljósmyndir verða til sýnis. Jónína Óskars tekur á móti gestum á Eyri, Þóra Ósk og Birgitta verða með garðsölu á Búðarstíg 20 og Álfrún og Kjartan með bílsskúrssölu á Þykkvaflöt 5b. Dario verður með garðsölu á Brennu 1 og Þórey Gylfadóttir býður á handverksmarkað á Eyrargötu 16c Háeyri.
Samsöngurinn í Húsinu er ómissandi fyrir marga en hann er kl. 19:30 á laugardagskvöld. Þar verður sungið upp úr Skólaljóðum og Heimir Guðmundsson leikur undir á eitt elsta píanó á Suðurlandi. Síðan skella allir sér á brennu þar sem trúbadorinn Gunnar Geir heldur uppi fjörinu og Hera Fjord flytur hátíðarræðu.
Dagskránni lýkur svo með Jónsmessuballi á Rauða húsinu þar sem Hljómsveitin Moskvít og Grétar Lárus Matthíasson halda uppi stuðinu.
Frítt inn er alla helgina á Byggðasafni Árnesinga og Sjóminjasafninu og frítt að veiða í Ölfusárósi fyrir landi Eyrarbakka.