Finnbogi Pétursson er einn þeirra sem tilnefndur er til Íslensku myndlistarverðlaunanna 2026 í flokknum myndlistarmaður ársins.
Finnbogi er tilnefndur fyrir sýninguna Skjálfti í Listasafni Árnesinga. Sýningin var opnuð í september 2025 og þar opnaði Finnbogi skynfærunum nýja leið að veruleikanum og afhjúpaði andlegri víddir þess efnislega með vísindalegri nálgun.
„Finnbogi vann hugmyndina að verkinu með tengdaföður sínum, jarðskjálftafræðingnum Ragnari Stefánssyni, sem jafnan var kallaður Ragnar skjálfti. Þeir hugðust vinna með jarðfræðilega virkni Hveragerðis, meðal annars með tæki sem Ragnar hafði þróað. Áður en hugmyndin að sýningunni var fullunnin lést Ragnar en til að heiðra minningu hans kom Finnbogi eldrauðu duftkeri fyrir í rýminu og vísar þannig til nærveru ástvinar,“ segir í umsögn dómnefndar.
Auk Finnboga eru tilnefnd þau Claudia Hausfeld, Kristín Gunnlaugsdóttir og Sigurður Ámundason. Verðlaunin verða afhent við hátíðlega athöfn í Austurbæjarbíói þann 11. mars.