Laugardaginn 6. apríl kl. 11 til 17 verða verk fimmtán búlgarska listamanna sýnd í Gullkistunni, miðstöð sköpunar að Dalbraut 1 á Laugarvatni
Ideas Factory Association í Búlgaríu og Gullkistan á Laugarvatni hafa að undanförnu unnið að samstarfsverkefninu Endurlífgun þorpa með aðgengi að menningu. Verkefnið raungerðist í frjóu samstarfi búlgörsku listamannanna og Ideas Factory ásamt Gullkistunni. Markmiðið var að leita áræðinna leiða til að örva skapandi hugsun í sex þorpum á jaðarsvæðum þar sem samdráttur er ríkjandi.
Verkin sem sett verða upp á Laugarvatni sýna afrakstur listamannannanna, sem dvöldu í einn mánuð hver í einhverju þorpanna sex sem tóku þátt í verkefninu BABA residence. Þorpin eru í Norðvestur-Búlgaríu, fátækasta héraði landsins. Listamennirnir bjuggu inni á heimilum, voru þátttakendur í heimilislífinu og stóðu fyrir fjölda menningarviðburða á meðan á dvölinni stóð.
Varð að veruleika vegna elju heimamanna
Verkefnið Endurlífgun þorpa með aðgengi að menningu varð að veruleika að mestu leyti vegna þátttöku og elju heimamanna, en fjárhagslegur stuðningur sem Ísland, Liechtenstein og Noregur veittu samkvæmt EES-fjárhagskerfinu skipti síðan sköpum. Meginmarkmið verkefnisins er að ýta úr vör sjálfbæru menningar- og frumkvöðlalíkani sem tekur á fólksfækkun þorpa með bættu aðgengi að menningu.
Alda Sigurðardóttir, framkvæmdastjóri Gullkistunnar, fór tvær ferðir til Búlgaríu á síðasta ári til að taka þátt í undibúningi fyrir veru listamannanna í þorpunum með erindi um rekstur Gullkistunnar fyrir fulltrúa úr þorpunum og síðan á ráðstefnuna Empatheast og sýningu um verkefnið. Alda Rose Cartwright, myndistarmaður á Stokkseyri og starfsmaður Listasafns Árnesinga, tók þátt í undirbúningsvinnunni og flutti þar erindi og Inga Jónsdóttir, fyrrverandi safnstjóri Listasafns Árnesinga, tók einnig þátt í ráðstefnunni og flutti þar erindi.
Fjölbreyttur bakgrunnur listamannanna
Listamennirnir sem eiga verk á sýningunni á Laugarvatni eru Aneta Mankovska (myndhöggvari og handverk), Antoaneta Quick (myndlistarmaður), Elena Stoycheva (kvikmyndaleikstjóri), Evgeni Mladenov (myndlistarmaður), Illiyana Grigorova (ljósmyndari), Kalin Mihov (listmálari), Maria Makedonska (teiknari og kvikmyndagerðarmaður), Mirela Karadzhova (myndlistarkona og móðir 24/7), Monika Igarenska (myndhöggvari), Nicola Zambelli (kvikmyndagerðarmaður), Sarah Craycraft (þjóðsagnarithöfundur og ljósmyndari), Stoyan Kostadinov (tónlistarmaður og semur ljóð), Vasil Kostadinov (landfræðingur og fararstjóri), Viktoriya Velcheva (vídeólistamaður), Yoana Shopova (tónlistarmaður).