Verðlaunaafhending í ensku smásagnakeppninni 2025, sem Félag enskukennara á Íslandi stendur fyrir, fór fram síðastliðinn mánudag við hátíðlega athöfn í Veröld – húsi Vigdísar í Reykjavík.
Nemendur frá Grunnskólanum í Hveragerði hafa verið aðsópsmiklir í keppninni undanfarin ár og engin undantekning var á því þetta árið. Fimm nemendur skólans hlutu verðlaun.
Hvergerðingar röðuðu sér í efstu sætin í 5. bekk; 1. verðlaun hlaut Ísabella Rán Andradóttir fyrir söguna Basketball Hero, 2. verðlaun hlaut Hugrún Gunnarsdóttir fyrir söguna Emma and Her Story og 3. verðlaun hlaut Hugi Þór Haraldsson fyrir söguna Neisti and I. Í 6.–7. bekk hlaut Baltasar Björn Sindrason 1. verðlaun fyrir söguna The Last Upgrade og í 8.–10. bekk hlaut Hera Fönn Lárusdóttir 3. verðlaun fyrir söguna A Life In Ink.
Það var sendiherra Bretlands á Íslandi Dr. Bryony Mathew sem afhenti nemendum verðlaunin.
Öllum grunn- og framhaldsskólum landsins stendur til boða að taka þátt í þessari keppni þar sem nemendur skrifa smásögur á ensku út frá ákveðnu orði, sem í ár var EPIPHANY.