Hin árlega tónlistarhátíð, Englar og menn í Strandarkirkju í Selvogi hefst sunnudaginn 6. júlí næstkomandi með tónleikum kl. 14. Hátíðin stendur yfir sem fyrr í júlímánuði og eru tónleikar alla sunnudaga kl. 14.
Á opnunartónleikum hátíðarinnar koma fram feðgarnir Kristinn Sigmundsson bassi og Jóhann Kristinsson baritón og flytja íslensk og erlend sönglög. Helga Bryndís Magnúsdóttir leikur með þeim á píanó og orgel.
„Það hefur staðið til í nokkur ár að fá þá feðga til okkar í Strandarkirkju en þeir verið afar uppteknir við störf sín erlendis. En nú var lag og það verður ánægjulegt fyrir okkur Sunnlendinga að fá að hlýða á þá í Strandarkirkju,“ segir Björg Þórhallsdóttir, listrænn stjórnandi hátíðarinnar.
Kristinn hefur sungið yfir 100 óperuhlutverk í öllum helstu óperuhúsum heims í tæpa fjóra áratugi og unnið til Grammy verðlauna ásamt fjölda annara verðlauna. Sonur hans, Jóhann, var útnefndur söngvari ársins á Íslensku tónlistarverðlaununum árið 2023 og hefur sungið með mörgum af virtustu sinfóníuhljómsveitum Evrópu.
Hljómfögur kirkja
Þetta er fjórtánda starfsár hátíðarinnar en hátíðin hefur alla tíð verið vel sótt. Margir koma um langan veg á tónleika enda bera margir hlýjar taugar til Strandarkirkju, sem er þekkt áheitakirkja og þar þykir vera sérstakur kraftur til hjálpar og bænheyrslu. Kirkjan er einstaklega hljómfögur og því ljúft að njóta þar tónlistarflutnings og drekka í sig sögu og anda kirkju og staðar.
Þar sem margir tónleikagestir koma um langan veg á tónleikana verður nú boðið upp á miðasölu á tix.is en einnig við innganginn. Tónleikar verða sem fyrr segir alla sunnudaga í júlímánuði kl. 14 og er dagskráin fjölbreytt og spennandi. Aðgangseyrir er kr. 4.500 og tónlistarhátíðin er styrkt af Uppbyggingarsjóði Suðurlands.