Á nýju ári fá landsmenn að njóta vandaðrar kvikmyndar/tónleikadagskrár þar sem íslenskar kirkjur og náttúra eru í aðalhlutverki. Verkefnið ber heitið Nýárstónleikar úr kirkjum og náttúru Suðurlands og er unnið af listrænu hjónunum Alexöndru Chernyshovu, sópran og tónskáldi, og Jóni Rúnari Hilmarssyni, ljósmyndara og kvikmyndagerðarmanni, í samstarfi við menningar- og fræðslufélagið DreamVoices ehf.
Þann 1. janúar 2026 kl. 20:00 verður verkefnið frumsýnt á netinu á heimasíðu www.alexandrachernsyhova.com og YouTube síðu Alexöndru og verður öllum opin.
Um er að ræða 30 mínútna kvikmynd/tónleikadagskrá þar sem tónlistarflutningur Alexöndru fléttast saman við fallegar myndir af kirkjum víða um land og íslenskri náttúru. Þau Alexandra og Jón segja markmið verkefnisins að gera klassíska tónlist aðgengilega breiðum hópi fólks og um leið varpa ljósi á kirkjur landsins sem mikilvægan hluta menningararfs þjóðarinnar.
Upptökur fóru fram í fjölmörgum kirkjum, meðal annars í Þingvallakirkju, Skálholtskirkju, Hallgrímskirkju, auk fleiri staða. Á efnisskrá eru klassíska verk eftir Wolfgang Amadeus Mozart, Charles Gounod og einnig eftir Alexöndru sjálfa.
Alexandra er listrænn verkefnisstjóri og sér um tónlistarflutning, en Jón Rúnar annast kvikmyndatöku og myndbandsvinnslu og er framkvæmdastjóri verkefnisins. Þau hafa unnið saman að fjölmörgum metnaðarfullum verkefnum síðustu tvo áratugi, þar á meðal Magical Sky Iceland sem er kvikmynd og frumsamin sinfónietta, Nýárstónleikum úr kirkjum Suðurnesja og Hljómahöllinni, sem hlutu afar góðar viðtökur áhorfenda.
Verkefnið fékk styrk úr Uppbyggingasjóði Suðurlands og einnig kirkjusjóði Þjóðkirkjunnar.