Sumarsýning Listasafns Árnesinga, Eruð þið ánægð ef þið megið spyrja um eitthvað?, verður opnuð í dag klukkan 15 en um er að ræða rannsóknarsýningu ungversks listfræðings; Zsóka Leposa á samskiptum íslenskra listamanna og ungverskra listamanna á áttunda áratugnum.
Á sjöunda og áttunda áratug síðustu aldar var framúrstefnulistamönnum frá austantjaldsríkjunum mikið kappsmál að tengjast hinum vestræna listheimi. Á sama tíma var vettvangur íslenskrar samtíðarlistar að opnast upp, m.a. fyrir stefnum á borð við flúxus og póst-list. Það kom til vegna ört stækkandi tengslanets listamanna og gallería á borð við SÚM og listagalleríð að Suðurgötu 7. Þessi tvíhliða tilraun að auknum tengslum leiddi svo til fjörlegra samskipta og nokkurra sýninga ungverskra listamanna hér á landi.
Á sýningunni í Listasafni Árnesinga er varpað ljósi á vinnubrögð listamannanna við þessa tengslamyndun og sýningagerð á Íslandi, á tíma þar sem strangar hömlur voru til staðar á ferða- og tjáningarfrelsi í Austur-Evrópu. Samvinna íslenskra og unverskra listamanna varð uppspretta spaugilegra viðburða sem vöktu fólk til umhugsunar á sama tíma og þeir báru tíðum vott um sjálfshæðni.
Sumarsýning Listasafns Árnesinga 2022 verður endurflutningur þessara viðburða ásamt nýrri verkum eftir sömu listamenn sem tóku þátt í þessu samstarfi á sínum tíma og blésu með því lífi í íslenska samtímalist á áttunda áratug síðustu aldar.
Meðal þeirra listamanna sem eiga verk á sýningunni eru Eggert Pétursson, Endre Tot, Gábor Attalai, Ingólfur Arnarsson, Kees Visser, Rúrí og Sigurður Guðmundsson.
Sýningin er styrkt af Safnaráði og Uppbyggingarsjóði Suðurlands og stendur til 4. september næstkomandi.