Ennþá gerast ævintýri

Sprettimyndabók. Ljósmynd/Aðsend

Viltu búa til þitt ævintýri, trölla- eða álfasögu? Og sviðsetja það í sprettimyndabók? Fjölskyldulistasmiðja mars mánaðar í Listasafni Árnesinga tengist sýningunni Einu sinni var… þar sem sjá má þjóðsagnamyndir Ásgríms Jónssonar í sviðsettu umhverfi.

Sprettimynda-bókagerð verður í Listasafni Árnesinga í Hveragerði sunnudaginn 31. bars kl. 14-16.

Sprettimyndabók er þrívíð bók eða sviðsmynd sem hægt er að draga út og saman líkt og harmónikku en í miðjunni birtist sviðsmynd þar sem þú skapar þitt eigið ævintýri.

Smiðjustjóri er sem fyrr Kristín Þóra Guðbjartsdóttir og hún verður til staðar kl. 14:00 – 16:00 til þess að aðstoða þátttakendur við að skapa sitt ævintýri í pappír.

Börn og foreldrar, ömmur og afar, frænkur og frændur eru hvattir til þess að nýta þetta tækifæri, koma og skoða sýninguna, ræða um hana og skapa saman í listasmiðjunni þar sem allt efni, pappír og litir eru til staðar og aðgangur og þátttaka í listasmiðjunni er ókeypis. Sýnd verða dæmi um útfærslur sem henta mismunandi aldri.