Alþjóðlega tónlistarhátíðin WindWorks í Norðri hefur tilkynnt að staðartónskáld hátíðarinnar 2026 er Elín Gunnlaugsdóttir, tónskáld á Selfossi.
WindWorks í Norðri er eina tónlistarhátíðin í Evrópu sem helguð er eingöngu blásturshljóðfærum og mun fara fram í fimmta sinn dagana 7.-14. ágúst næstkomandi á ýmsum söfnum og menningarstöðum á Norðurlandi eystra.
Elín er afar virkt tónskáld en hún hefur samið fjölda verka fyrir innlenda og erlenda hópa, þar á meðal Sinfóníuhljómsveit Íslands, Caput-hópinn, Duo Harpverk og Schola Cantorum.
Mikil eftirvænting ríkir í tónlistarheiminum eftir nýjum verkum hennar sem munu hljóma á hátíðinni. Verkin samdi hún að beiðni Pamelu De Sensi, listræns stjórnanda hátíðarinnar, en þau eru meðal annars samin fyrir bandaríska málmblásturs tríóið Sapphire Brass Trio, ítalska flautuleikarann Caterina Compagno, fyrir flautu- og saxófón dúó og fyrir trompet og básúnu dúó. Verk Elínar munu jafnframt tengjast sögu og umhverfi þeirra safna þar sem frumflutningarnir fara fram.
Verk Elínar dýpka og auðga hátíðina
„Við erum ótrúlega spennt og stolt að fá Elínu Gunnlaugsdóttur til liðs við okkur sem staðartónskáld fyrir árið 2026. Hún er einstaklega hæfileikaríkt tónskáld og við getum ekki beðið eftir að hefja þetta spennandi samstarf. Verk hennar munu dýpka og auðga dagskrá hátíðarinnar á einstakan hátt,“ segir í tilkynningu frá hátíðinni.
WindWorks í Norðri hefur vaxið hratt á undanförnum árum og vakið mikla athygli fyrir að færa hágæða blásturstónlist úr hefðbundnum tónleikasölum yfir í skapandi umhverfi íslenskra safna, með hjarta hátíðarinnar á Akureyri. Hátíðin brúar bil á milli frá endurreisnartónlist til samtímatónlistar það sem íslensk tónlist skipar sem fyrr stóran sess í hjarta hátíðarinnar.
Nánari upplýsingar um dagskrá og tónleika verða kynntar bráðlega. Aðgangur á alla tónleikana verður ókeypis.