Í dag kl. 15 verður opnuð samsýningin 23 ljósmyndara í Gallerí Fold við Rauðarárstíg. Yrkisefni þeirra eru eldgosin á Fimmvörðuhálsi og í Eyjafjallajökli.
Á sýningunni eru margar þekktar ljósmyndir sem birst hafa í stærstu fjölmiðlum um heim allann auk annarra sem koma nú fyrir sjónir almennings í fyrsta skipti. Sýningin nefnist Úr iðrum jarðar.
Ljósmyndarnir koma úr ýmsum áttum sem nálgast myndefni sitt með ólíkum hætti en sameinast í áhuga sínum á náttúru landins og hinum mannlega þætti sem birtist í baráttu fólks við náttúruröflin.
Meðal ljósmyndara sem eiga myndir á sýningunni eru Brynjar Gauti, Ingólfur Júlíusson, Jón Páll Vilhelmsson, Jón Viðar Sigurðsson, Rósant Guðmundsson og Sigursteinn Baldursson.
Þetta er lifandi sýning sem stendur í allt sumar og munu nýjar myndir berast ef breytingar verða á gosinu eða önnur gos eiga sér stað.
Við opnun sýningarinnar verður boðið upp á gos og hraun.