Á næsta uppboði hjá Fold uppboðshúsi í Reykjavík verður meðal annars boðið upp einstakt olíumálverk eftir Ásgrím Jónsson frá Suðurkoti í Flóa. Verkið nefnist Í Húsinu og það málaði Ásgrímur á Eyrarbakka árið 1905. Það er metið á 10 til 12 milljónir króna.
Ásgrímur var vikapiltur hjá Nielsen verslunarstjóra í Húsinu á Eyrarbakka árið 1890, þá nýfermdur. Húsið var á þeim tíma var eitt mesta menningarheimili landsins. Þar voru ekki aðeins myndir á veggjum heldur einnig eitt fyrsta píanóið í einkaeigu á öllu Suðurlandi.
Dvölin í Húsinu hafði mikil áhrif á Ásgrím. Þar eignaðist hann sína fyrstu vatnsliti og notaði hverja lausa stund til að æfa sig að teikna upp myndir úr dönskum myndablöðum. Hið menningarlega andrúmsloft heimilisins hefur þó ekki skipt minna máli.
Verkið sýnir heimilisfólk og vini saman í stofunni að njóta tónlistar við skin olíulampans. Það er málað dökkum litum en ljósu tónarnir skapa bæði dramatík og hlýju. Að sögn Jóhanns Ágústs Hansen, listmunasala hjá Fold, er um að ræða einstaka perlu í höfundaverki Ásgríms.
Verkið er á svolölluðu perluuppboði, sem haldið verður fimmtudaginn 21. maí nk. Sýning verkanna stendur yfir hjá Fold uppboðshúsi við Rauðarárstíg og verður opið alla daga fram að uppboðinu en sýningarskrá má einnig nálgast á vefnum uppbod.is.