Hátíðarsalurinn í Fjölbrautaskóla Suðurlands iðaði af lífi síðastliðinn laugardag þegar fjölmenningarhátíð Árborgar var haldin. Síðast fór slík hátíð fram í sama sal árið 2001.
Að þessu sinni var það Sveitarfélagið Árborg sem hafði veg og vanda af hátíðinni enda óhætt að segja að sveitarfélagið sé ríkt af fjölbreyttri menningu. Sem dæmi má nefna að í leik- og grunnskólum Árborgar eru töluð 48 tungumál.
Fjórtán þjóðir kynntu menningu sína með fjölbreyttum hætti. Matur var áberandi og margvíslegir munir skreyttu borð þátttakenda. Danshópar frá Taílandi og Afganistan sýndu listir sínar og strengjanemendur Tónlistarskóla Árnesinga fluttu lög frá þremur löndum undir stjórn kennara síns, Uelle Hahndorf.
Gestir frá Félagi kvenna af erlendum uppruna kynntu starfsemi félagsins, starfsfólk Bókasafnsins á Selfossi kynnti verkefnið Gefum íslensku séns, Fræðslunet Suðurlands kynnti sína starfsemi og það sama gerði Leikfélag Selfoss.
Á sjötta hundrað gestir mættu til að smakka, hlusta, spjalla og njóta þess sem í boði var. Ummælin sem oftast heyrðust voru á þá leið að hátíðin hefði tekist afar vel: „Þetta er frábært – næst þarf stærri sal!“
Hér fyrir neðan eru nokkrar myndir frá hátíðinni.
