Kótelettan BBQ & Music Festival fór glæsilega af stað á Selfossi í gærkvöldi þegar hundruð gesta komu saman á Eimskipssviðinu við Hvítahúsið til að njóta ókeypis upphitunartónleika sem markuðu upphaf hátíðarhelgarinnar.
Frábær stemning ríkti frá fyrstu mínútu þegar tónlistarfólk á borð við Aron Can, Jón Jónsson ásamt hljómsveit, Koppafeiti, Slysh og Svitabandið steig á svið. Gestir á öllum aldri nutu kvöldsins og fylltu miðbæ Selfoss af lífi þar sem Kótelettan hóf formlega göngu sína.
„Það er alltaf sérstök tilfinning þegar fyrstu tónarnir hljóma og hátíðin fer af stað. Upphitunarkvöldið tókst einstaklega vel og það var gaman að sjá hversu margir lögðu leið sína á tónleikana. Þetta er nákvæmlega sú stemning sem við viljum skapa og hún gefur okkur mikla tilhlökkun fyrir framhaldið,“ segir Einar Björnsson, stofnandi Kótelettunnar.
Stóru tónleikakvöldin fram undan
Í kvöld tekur Kótelettan Music Festival við af fullum krafti með yfir 30 tónlistaratriðum á tveimur kvöldum. Á meðal þeirra sem koma fram um helgina eru Aron Can, Herra Hnetusmjör, GDRN, Sigga Beinteins, Eiríkur Hauksson, Retro Stefson, Stuðlabandið, Páll Óskar, FM95BLÖ, Birnir, Emmsjé Gauti, Klara Einars, Papar, Doctor Victor og fjölmargir fleiri.
Ókeypis fjölskylduhátíð á laugardag
Á morgun verður síðan BBQ Festival Kótelettunnar með ókeypis aðgangi fyrir alla frá klukkan 13:00 til 16:00. Þar verður fjölbreytt dagskrá með VÆB, Emmsjé Gauta, Línu Langsokk, Ívari og Hákoni, Guðjóni Smára og Jónu Margréti, Freyju Karamelluflugu og Hvolpasveitinni, auk Stóru grillsýningar Kótelettunnar, Góðgerðagrillsins, tívolía og fjölbreyttrar afþreyingar fyrir alla fjölskylduna.
Skipuleggjendur segja allt tilbúið fyrir tvö stór tónleikakvöld og fjölskyldudag þar sem þúsundir gesta eru væntanlegir á Selfoss.
