Einar Bárðar fagnar 20 ára höfundarafmæli í Hvíta húsinu

Einar Bárðarson fagnar 20 ára höfundarafmæli sínu með sögustund og „singalong“ tónleikum í Hvíta Húsinu á Selfossi ásamt hljómsveit og gestum föstudaginn 8. febrúar næstkomandi.

Þar fer Einar yfir 20 ára feril sinn sem dægurlagahöfundur en í vor voru 20 ár frá því lagið Farin kom út með hljómsveitini Skítamóral en lagið varð þeirra allra vinsælasta og sló í gegn nánast á einni nóttu. Svo fylgdu lögin eitt af öðru sem heimsóttu þann ágæta lista; Birta, Spenntur, Myndir, EnnþáÉg sé þig og fleiri og fleiri.

Einar hefur sjálfur ekki verið mikið að koma fram sem flytjandi en tónleikarnir í Hvíta Húsinu eru liður í að fagna höfundarafmælinu og þar mun hann koma fram ásamt völdu tónlistarfólki og nokkrum valinkunnum söngvurum. Einar fer yfir sögurnar á bak við sín vinsælustu lög og flytja þau með sínu nefi ásamt vinum og félögum.

Hljómsveitina skipa þeir Þórir Úlfarsson á píanó og hammond, Eiður Arnarson á bassa, Hannes Friðbjarnarson á trommur og þeir Kristján Grétarsson og Pétur Valgarð Pétursson á gítara. Sérstakir gestir verða meðal annarra Einar Ágúst Víðisson og Gunnar Ólason úr Skítamóral ásamt fleirum.

Hægt er að kaupa miða á tónleikanna í forsölu á midi.is.

Plata í lok janúar

Lög Einars hafa alltaf fengið ágætan meðbyr í útvarpi og þrátt fyrir að mörg laganna séu kominn á tvítugsaldurinn heyrast þau enn með jöfnu milli bili á stærstu útvarpstöðum landsins. Einar hefur þó nokkuð fágæta stöðu í hópi dægurlaga höfunda á Íslandi þar sem hann er einn örfárra sem aldrei hefur flokkast sem flytjandi enda hefur hann aldrei gefið út efni undir eigin nafni eða komið fram sem slíkur.

Það er tónlistarmaðurinn og upptökustjórinn Þórir Úlfarsson sem stýrir upptökum á plötunni en hún verður bæði ljúf og hrjúf í anda höfundarins með Nashville áhrifum, en Einar hefur alla tíð sótt sinn innblástur til amerískrar country-skotinnar dægurtónlistar.

Á plötunni er ætlunin að setja ákveðna heildarmynd á þessi vinsælustu lög hans og hugmyndin að þessi helstu verk höfundar fái nýtt og heimilislegt líf í flutningi hans og félaga.Platan hefur fengið nafnið Myndir sem er vitaskuld tilvísun í eitt þekktasta lag Einars en um leið eru lögin hversdagslýsingar á lífi fólks eða myndir af lífi þeirra eins og höfundurinn útskýrir nafngiftina. Platan mun koma út í haust en upptökur er langt komnar.

Frá höfundartónleikum Einars í Bæjarbíói í Hafnarfirði í vetur.